నాసిక్: మరాఠా విద్యా ప్రసారక్ (MVP) సంస్థ ఆధ్వర్యంలో నడుస్తున్న డాక్టర్ వసంతరావు పవార్ మెడికల్ కాలేజీలో జరిగిన లిఫ్ట్ ప్రమాదంలో తీవ్రంగా గాయపడిన జ్యోతి అహిరే అనే కాంట్రాక్ట్ ఉద్యోగిని, సోమవారం అర్ధరాత్రి చికిత్స పొందుతూ మరణించారు.
అసలేం జరిగిందంటే? అందుబాటులో ఉన్న సమాచారం ప్రకారం, జ్యోతి అహిరే లిఫ్ట్ తలుపు తెరిచి ఉండటాన్ని గమనించారు. కుతూహలంతో లోపల ఏముందో చూడటానికి ఖాళీగా ఉన్న ఆ లిఫ్ట్ షాఫ్ట్లోకి తలపెట్టి చూశారు. సరిగ్గా అదే సమయంలో, పై అంతస్తు నుండి లిఫ్ట్ ఒక్కసారిగా కిందకు దిగింది. ఆ వేగానికి ఆమె తల, మెడ భాగం చిక్కుకుపోయి వెన్నెముకకు తీవ్ర గాయాలయ్యాయి. వెంటనే ఆమెను ఐసీయూకి తరలించినప్పటికీ, పరిస్థితి విషమించడంతో ఆమె ప్రాణాలు విడిచారు.
కాలేజీ యాజమాన్యం వివరణ: అయితే, ఈ ప్రమాదం జరిగింది సాధారణ ప్యాసింజర్ లిఫ్ట్లో కాదని కాలేజీ యాజమాన్యం స్పష్టం చేసింది. అది శస్త్రచికిత్సకు సంబంధించిన పరికరాలను (surgical equipment drums) తరలించే ‘హోయిస్ట్ ట్రాలీ’ అని వారు తెలిపారు.
ప్రమాద స్థలాన్ని పరిశీలించిన ప్రభుత్వ ఎలక్ట్రికల్ ఇంజనీర్.. ట్రాలీలో ఎటువంటి మెకానికల్ ఫెయిల్యూర్ (సాంకేతిక లోపం) లేదని ప్రాథమికంగా నిర్ధారించారు. బాధిత మహిళ భద్రతా కంచెను దాటి నిషిద్ధ ప్రాంతంలోకి ప్రవేశించారని, భద్రతా నియమాలను ఉల్లంఘించి ట్రాలీ వెళ్లే మార్గంలోకి వంగి చూడటం వల్లే ఈ ప్రమాదం జరిగిందని విచారణలో తేలింది.
మరోవైపు, ఈ భయంకరమైన ప్రమాదానికి సంబంధించిన సీసీటీవీ ఫుటేజీ సోషల్ మీడియాలో వైరల్గా మారింది.