న్యూఢిల్లీ: ఒక యువతి అర్ధరాత్రి వేళ ఢిల్లీ నుండి గుర్గావ్ (గురుగ్రామ్) లాంటి రూట్లో క్యాబ్లో ఒంటరిగా ప్రయాణిస్తుంటే.. ఆమె కుటుంబ సభ్యుల ఆందోళన రెట్టింపు అవ్వడం సహజం. కానీ, ఈ ప్రపంచంలో ఈనాటికీ మంచి మనసున్న, తోటివారికి సహాయపడే వ్యక్తులకు కొరత లేదని నిరూపించే ఒక అద్భుతమైన వీడియో ప్రస్తుతం సోషల్ మీడియాలో వెలుగులోకి వచ్చింది.
ఒక క్యాబ్ డ్రైవర్ తన ప్రయాణికురాలి భద్రతకు సంబంధించి ఇచ్చిన నమ్మకం, భరోసా ప్రస్తుతం ఇంటర్నెట్లో లక్షలాది మంది నెటిజన్ల హృదయాలను గెలుచుకుంది.
సోదరుడి ఆందోళన – గమనించిన డ్రైవర్:
‘లక్ష్య మెహతా’ అనే సోషల్ మీడియా యూజర్ తన ‘X’ (ట్విట్టర్) ఖాతాలో ఈ వీడియోను షేర్ చేయడంతో ఈ ఉదంతం వెలుగులోకి వచ్చింది. వీడియోలో.. ఒక యువతి అర్ధరాత్రి వేళ ఢిల్లీ నుండి గుర్గావ్ వెళ్లేందుకు క్యాబ్ ఎక్కుతుండగా, కారు బయట ఆమె సోదరుడు నిలబడి ఉన్నాడు. తన చెల్లి భద్రతపై అతడి ముఖంలో ఆందోళన స్పష్టంగా కనిపిస్తోంది. “దారి పొడవునా నాతో టచ్లో ఉండు, లైవ్ లొకేషన్ అప్డేట్ చేస్తూ ఉండు” అని అతడు తన చెల్లికి పదే పదే చెప్తున్నాడు. ఏ సాధారణ భారతీయ కుటుంబంలోనైనా కనిపించే ఒక అన్నయ్య ఆరాటం అతని మాటల్లో వినిపించింది.
కారు బయట ఉన్న అన్నయ్యకు, లోపల కూర్చున్న చెల్లికి మధ్య జరుగుతున్న ఈ సంభాషణను క్యాబ్ డ్రైవర్ ఎంతో శ్రద్ధగా విన్నాడు. ఆ అన్నయ్య ఆందోళనను చూసి సదరు డ్రైవర్ ఊరికే ఉండలేకపోయాడు. వెంటనే జోక్యం చేసుకుంటూ.. వారిద్దరి టెన్షన్ను ఒక్క క్షణంలో దూరం చేసేలా ఎంతో మనసుకు హత్తుకునే మాటలు చెప్పాడు. “సార్, నా కారు బయట నా ఫోన్ నెంబర్, అడ్రస్ రాసి ఉన్నాయి. మీరు వాటిని ఫోటో తీసుకోండి, ఏ ఇబ్బందీ లేదు. ఈమె కూడా నా చెల్లెలు లాంటిదే” అని ఎంతో ప్రేమగా చెప్పాడు.
‘మీ అన్నయ్య కార్లోనే వెళ్తున్నావని అనుకోమ్మా’..
డ్రైవర్ మాటలకు ఆ యువతి ఎంతో కృతజ్ఞతతో.. “క్యాబ్ ప్రయాణం కదా భయ్యా.. ఫ్యామిలీ అన్నాక ఆ మాత్రం కంగారు ఉండటం సహజమే కదా.. థాంక్యూ భయ్యా” అంది. ఆ తర్వాత డ్రైవర్ చెప్పిన మాటలు సోషల్ మీడియాలో అందరినీ భావోద్వేగానికి గురిచేసాయి.
డ్రైవర్ నవ్వుతూ.. “అస్సలు టెన్షన్ పడకండి. ఇది మీ అన్నయ్య కారే అనుకోండి. ప్రశాంతంగా కూర్చోండి. నీ అన్నయ్య యూట్యూబర్ కదా.. నేను నా చిన్న చెల్లెలిని ఎలా జాగ్రత్తగా తీసుకెళ్తానో, ఈమెను కూడా అలాగే సురక్షితంగా మీ ఇంటికి చేరుస్తాను. ఏమాత్రం భయం లేకుండా కూర్చోండి.. మీ సొంత అన్నయ్య బండిలోనే వెళ్తున్నట్లు భావించండి” అని అభయమిచ్చాడు.
సలాం చేస్తున్న ఇంటర్నెట్ – అతడే రియల్ హీరో:
క్యాబ్ డ్రైవర్ మాట్లాడిన ఈ చిన్న వీడియో ప్రస్తుతం సోషల్ మీడియాలో విపరీతంగా హల్చల్ చేస్తోంది. నెటిజన్లు ఈ వీడియోను పదే పదే చూస్తూ సదరు డ్రైవర్పై ప్రశంసల జల్లు కురిపిస్తున్నారు.
రోజువారీ వార్తల్లో మహిళల రక్షణకు సంబంధించి ఎన్నో భయానక ఘటనలు వింటున్న తరుణంలో.. ఇలాంటి సంఘటనలు సమాజంపై ఒక సానుకూలమైన నమ్మకాన్ని, ఆశను చిగురింపజేస్తాయని నెటిజన్లు కామెంట్లు పెడుతున్నారు. తోటి మనిషికి భరోసానిచ్చిన ఈ క్యాబ్ డ్రైవరే ‘నిజమైన హీరో’ అంటూ నెటిజన్లు అతనికి సలాం చేస్తున్నారు.