లక్నో: ఉత్తరప్రదేశ్ రాజధాని లక్నోలోని రహీమాబాద్ పోలీస్ స్టేషన్ పరిధిలోని మనకౌటి గ్రామంలో ఇద్దరు యువతులు రైలు కింద పడి ప్రాణాలు వదిలారు. 23 ఏళ్ల నీతూ, 20 ఏళ్ల శశి ఇద్దరూ రైలు కింద పడి ఆత్మహత్య చేసుకున్నారు. వారి మృతదేహాలు లభించిన ప్రదేశానికి సుమారు వంద మీటర్ల దూరంలో పొలంలో వారి చెప్పులు, శాలువా లభ్యమయ్యాయి. దీనిని బట్టి వారు తమ వస్తువులను అక్కడ వదిలివేసి, రైలు ముందుకు దూకినట్లు పోలీసులు భావిస్తున్నారు.
చిన్ననాటి స్నేహితులు: నీతూ, శశి చిన్నప్పటి నుండి కలిసి పెరిగారు. నీతూ ఇంటర్మీడియట్ వరకు, శశి హైస్కూల్ వరకు కలిసి చదువుకున్నారు. ఆరు నెలల క్రితమే నీతూకు ఉన్నావ్‌లో వివాహం జరిగింది. అయితే, నీతూకు పెళ్లయినప్పటి నుండి శశి చాలా దిగులుగా, కలత చెందుతూ ఉండేదని సమాచారం.
చికిత్స కోసం వచ్చి..: బుధవారం ఉదయం 10 గంటల సమయంలో నీతూ తన మరిదితో కలిసి అత్తగారింటి నుండి పుట్టింటికి వచ్చింది. నీతూ తండ్రి బుద్ధా తెలిపిన వివరాల ప్రకారం.. ఆమె అనారోగ్యంతో చికిత్స చేయించుకోవడానికి పుట్టింటికి వచ్చింది. అయితే, ఆమె రైలు పట్టాల వైపు ఎందుకు వెళ్లిందో తనకు తెలియదని ఆయన వాపోయారు.
అంతుచిక్కని మరణం: శశి అన్న వినోద్ మాట్లాడుతూ.. వారిద్దరూ చిన్ననాటి స్నేహితులని, కానీ వారు ఎందుకు ప్రాణాలు తీసుకున్నారో తనకు తెలియదని చెప్పారు. శశికి ఎవరితోనూ గొడవలు లేవని ఆయన స్పష్టం చేశారు. గ్రామస్థులు కూడా ఈ విషయంలో ఏమీ చెప్పలేకపోతున్నారు. ప్రస్తుతం పోలీసులు మృతదేహాలను పోస్ట్‌మార్టం నిమిత్తం తరలించి, కేసు దర్యాప్తు చేస్తున్నారు.