రాజస్థాన్: జైపూర్లో ప్రభుత్వ ఉద్యోగం మరియు కుటుంబ ఆస్తిని దక్కించుకోవాలనే దురాశతో, 23 ఏళ్ల యువతి తన సొంత తల్లిని కిరాయి హంతకులతో హత్య చేయించిన ఘటన వెలుగులోకి వచ్చింది.
జైపూర్లోని ప్రతాప్ నగర్కు చెందిన నీరజ్ శర్మ (45) అనే మహిళ, జూలై 3వ తేదీన అతివేగంగా వచ్చిన స్కార్పియో కారు ఢీకొనడంతో మరణించారు. మొదట ఇది సాధారణ రోడ్డు ప్రమాదం అని అందరూ భావించారు. అయితే, నీరజ్ శర్మ సోదరుడు రాకేష్ అనుమానంతో పోలీసులకు ఫిర్యాదు చేయడంతో అసలు విషయం బయటపడింది. సిసిటివి ఫుటేజ్ మరియు సెల్ఫోన్ కాల్ డేటాను పరిశీలించగా, ఇది ప్రమాదం కాదని, పక్కా పథకం ప్రకారం జరిగిన హత్య అని తేలింది.
విచారణలో దిగ్భ్రాంతికరమైన విషయాలు బయటపడ్డాయి. గత ఏడాది నీరజ్ శర్మ భర్త చనిపోవడంతో, ఆమెకు ‘కారుణ్య నియామకం’ (Compassionate Appointment) కింద ప్రభుత్వంలో జూనియర్ క్లర్క్ ఉద్యోగం వచ్చింది. ఈ ఉద్యోగాన్ని మరియు ఆస్తిని ఎలాగైనా చేజిక్కించుకోవాలని ఆమె కుమార్తె ఆయుషి భావించింది. ఇదే విషయమై తల్లితో తరచూ గొడవ పడేది. చివరికి, దురాశతో తన మామ మరియు ఇతర బంధువులతో కలిసి తల్లిని చంపేందుకు కుట్ర పన్నింది. కిరాయి హంతకులను నియమించి, ఈ హత్యను రోడ్డు ప్రమాదంగా చిత్రీకరించారు.