“నేను నా ప్రియుడితోనే ఉంటాను!”.. కూతురు చెప్పిన మాట విని కోర్టు ప్రాంగణంలోనే ప్రియుడి తండ్రిని చెప్పుతో కొట్టిన తల్లి.. ప్రియుడితో వెళ్లిపోయిందని కాళ్లతో తొక్కి కిరాతక దాడి..!!

ఉత్తరప్రదేశ్ రాష్ట్రం హమీర్‌పూర్ జిల్లాలో ప్రేమ వ్యవహారానికి సంబంధించి కోర్టు ప్రాంగణంలో జరిగిన ఒక సంఘటన తీవ్ర కలకలం రేపింది.

గత సెప్టెంబర్ 20వ తేదీన, హమీర్‌పూర్ జిల్లా బివాన్ ప్రాంతానికి చెందిన ఒక యువతి, తన ప్రియుడితో కలిసి ఇంటి నుంచి వెళ్లిపోయింది. దీనిపై కేసు నమోదు చేసిన పోలీసులు, తీవ్రంగా గాలించి గత బుధవారం ఆ యువతిని పట్టుకున్నారు.

ఆ తర్వాత, గురువారం నాడు ఆ యువతి వాంగ్మూలాన్ని నమోదు చేసేందుకు పోలీసులు ఆమెను కోర్టులో హాజరుపరిచారు. కోర్టులో న్యాయమూర్తికి వాంగ్మూలం ఇచ్చిన ఆ యువతి, తాను తన ప్రియుడితోనే కలిసి జీవించాలనుకుంటున్నట్లు తెగేసి చెప్పింది.

కూతురు ఇచ్చిన ఈ వాంగ్మూలాన్ని వినగానే కోర్టు ప్రాంగణం బయట వేచి ఉన్న ఆమె తల్లి తీవ్ర ఆగ్రహానికి గురైంది. కోపంతో ఊగిపోయిన ఆమె, అక్కడే ఉన్న ప్రియుడి తండ్రిని అకస్మాత్తుగా చుట్టుముట్టి చెంపపై కొట్టి, కాలితో తన్ని, చెప్పుతో దాడి చేసి హింసకు పాల్పడింది. ఈ ఘటన తర్వాత, ఆ తల్లి అక్కడున్న కారులో ఎక్కి పరారైంది.

కోర్టు ప్రాంగణంలో తల్లి దాడి చేస్తున్న ఈ దృశ్యాన్ని అక్కడున్నవారు వీడియో తీసి సోషల్ మీడియాలో పోస్ట్ చేయడంతో అది వైరల్‌గా మారింది. ఈ ఘటనపై సదర్ డిప్యూటీ సూపరింటెండెంట్ ఆఫ్ పోలీస్ (డీఎస్పీ) యశ్‌పాల్ సింగ్ మాట్లాడుతూ, “ఈ ఘటనపై ఇప్పటివరకు పోలీసులకు ఎలాంటి అధికారిక సమాచారం అందలేదు. రెండు వర్గాల నుంచి ఇప్పటివరకు ఎలాంటి లిఖితపూర్వక ఫిర్యాదు అందలేదు. ఏదైనా ఫిర్యాదు అందితే, దాని ఆధారంగా తగిన చట్టపరమైన చర్యలు తీసుకుంటాం” అని తెలిపారు.