‘సైరాట్’ సినిమాతో దేశవ్యాప్తంగా గుర్తింపు తెచ్చుకున్న నటి రింకూ రాజ్‌గురు గత పదేళ్లుగా చిత్ర పరిశ్రమలో రాణిస్తున్నారు. సోషల్ మీడియాలో చురుగ్గా ఉంటూ తన అభిప్రాయాలను స్పష్టంగా చెప్పే రింకూ, తాజాగా ఒక ఇంటర్వ్యూలో తన ఆధ్యాత్మిక మార్పు గురించి ఆసక్తికర విషయాలను వెల్లడించారు. తాను ఒకప్పుడు దేవుడిని నమ్మని నాస్తికురాలిని అని, కానీ కొన్ని సంఘటనల వల్ల ఇప్పుడు ఆధ్యాత్మికత వైపు మళ్ళానని ఆమె చెప్పుకొచ్చారు.
నా జీవితంలో జరిగిన ఆ సంఘటనల వల్లే… రాజ్‌శ్రీ మరాఠీకి ఇచ్చిన ఇంటర్వ్యూలో రింకూ మాట్లాడుతూ: “నేను మొదట నాస్తికురాలిని. కానీ కేదార్‌నాథ్ వెళ్ళినప్పుడు జరిగిన కొన్ని అనుభవాల వల్ల దేవుడిపై నమ్మకం కలగడం మొదలైంది. ఆ తర్వాత ఉపవాసాలు చేయడం ప్రారంభించాను, నాకు మంచి అనుభవాలు ఎదురయ్యాయి. ఇప్పుడు నేను పూజలు, మంత్రాలు, పండుగల వైపు మొగ్గు చూపుతున్నాను. వీటి వెనుక శాస్త్రీయ కారణాలు కూడా ఉన్నాయి. ఏదో ఒక అదృశ్య శక్తి ఉంది, ఆ శక్తి అనుగ్రహం ఉన్నప్పుడే మనం దేవుడిని నమ్మడం మొదలుపెడతాము. నా జీవితంలో కొన్ని పరిస్థితుల వల్ల అక్కడే నాకు ప్రశాంతత, ఆశ కనిపిస్తాయని అనిపించింది. ఇప్పుడు ప్రతిరోజూ ఉదయం ఇంట్లో పూజ చేయడం, జపం చేయడం నాకు చాలా ఇష్టం.”
మర్చిపోలేని కేదార్‌నాథ్ అనుభవం: తన కేదార్‌నాథ్ యాత్ర గురించి వివరిస్తూ: “అది ఒక మర్చిపోలేని అనుభవం. హఠాత్తుగా కేదార్‌నాథ్ వెళ్ళాలనిపించి బయలుదేరాను. గురువారం పౌర్ణమి రోజున కొండ పైకి నడుచుకుంటూ వెళ్ళాను. చాలా అలసిపోయాను, ఏడ్చాను కూడా. దర్శనం పూర్తయ్యాక తిరిగి వెళ్ళడానికి కనీసం హెలికాప్టర్ దొరికితే బాగుండు అని కోరుకున్నాను. మరుసటి రోజు మాకు ఫ్లైట్ ఉంది. హెలికాప్టర్ దొరుకుతుందని ఒకరు చెప్పారు, కానీ రెండు మూడు గంటలు వేచి చూసినా దొరకలేదు. చీకటి పడుతుండటంతో.. ‘దేవుడా నాకు హెలికాప్టర్ దొరికేలా చూడు, మళ్ళీ నా కుటుంబంతో కలిసి నీ దర్శనానికి వస్తాను’ అని మొక్కుకున్నాను.”
దేవుడిని తిట్టుకున్నా.. వెంటనే శిక్ష పడింది: “మరో వ్యక్తి వచ్చి ఇక హెలికాప్టర్ దొరకదు అని చెప్పాడు. ఆ సమయంలో నాకు చాలా కోపం వచ్చింది, ఏడుస్తూనే దేవుడిని తిట్టుకున్నాను. ‘ఇదేం దేవుడు.. నా మాట వినడం లేదు.. ఒక హెలికాప్టర్ కూడా ఏర్పాటు చేయలేవా?’ అంటూ విసుక్కుంటూ ముందుకు వెళ్తుంటే.. వెనుక నుండి ఒక వ్యక్తి వచ్చి ‘హెలికాప్టర్ ఉంది కానీ కేవలం రెండు సీట్లు మాత్రమే ఖాళీగా ఉన్నాయి’ అని చెప్పాడు. ఆ ఆనందంలో నేను పరుగెడుతూ కింద పడిపోయాను, నా మోకాలికి దెబ్బ తగిలింది. అప్పుడు నాకు అర్థమైంది.. దేవుడిని తిట్టినందుకు నాకు అక్కడికక్కడే శిక్ష పడిందని. అప్పటి నుండి నేను దేవుడిని ఎప్పుడూ విమర్శించకూడదని నిర్ణయించుకున్నాను.”
చివరిగా మాట్లాడుతూ, “అక్కడ చాలా మంది వేచి చూస్తున్నా, మా ఇద్దరికే హెలికాప్టర్ సీట్లు దొరకడం అనేది ఆ దైవ శక్తి వల్లనే అని నేను నమ్ముతున్నాను” అని రింకూ పేర్కొన్నారు.