మహారాష్ట్రలోని నాగ్పూర్లో మద్యం మత్తులో ఉన్న ఒక వ్యక్తి, కాకిని తన సైకిల్ వెనుక వైపు కట్టేసి వేధించిన సంఘటన ఆ ప్రాంతంలో తీవ్ర దిగ్భ్రాంతిని, ఆగ్రహాన్ని కలిగించింది.
నాగ్పూర్లో చోటుచేసుకున్న ఈ ఘటనకు సంబంధించిన వివరాలు, షాకింగ్ వీడియో ఇన్స్టాగ్రామ్లో వైరల్గా మారాయి. ఆ పోస్ట్ ప్రకారం.. పూర్తి మద్యం మత్తులో ఉన్న ఒక వ్యక్తి, సరిగ్గా నడవలేని స్థితిలో ఉండి కూడా ఒక కాకిని పట్టుకుని దాని ఈకలను పీకుతూ సైకిల్ క్యారియర్కు కట్టేసి తీసుకెళ్లాడు.
ఇది గమనించిన జంతు సంక్షేమ కార్యకర్తలు వెంటనే ఆ వ్యక్తిని అడ్డుకుని ప్రశ్నించారు. కాకిని ఎక్కడికి తీసుకెళ్తున్నావని అడగ్గా, “నేనే దాన్ని పట్టుకున్నాను, వండుకుని తింటాను” అని ఆ వ్యక్తి చాలా అలక్ష్యంగా సమాధానమిచ్చాడు. ఇది విని షాక్ తిన్న వారు, వెంటనే రంగంలోకి దిగి ఆ పక్షిని కాపాడారు.
ఆ వ్యక్తి నుంచి కాకిని విడిపించడానికి ప్రయత్నించగా, అతడు పోలీసులను పిలుస్తానంటూ గొడవకు దిగాడు. అంతేకాకుండా బూతులు తిడుతూ, కాకిని మళ్లీ తన ఆధీనంలోకి తీసుకోవడానికి ప్రయత్నించాడు.
అయినప్పటికీ, ఆ వ్యక్తి ప్రతిఘటనను దాటుకుని జంతు సంక్షేమ కార్యకర్తలు కాకిని విజయవంతంగా కాపాడి సురక్షితమైన ప్రాంతానికి తీసుకెళ్లారు. ప్రస్తుతం ఆ పక్షి సురక్షితంగా ఉందని, పూర్తిగా కోలుకున్న తర్వాత సురక్షితమైన ఖాళీ ప్రదేశంలో వదిలిపెడతామని తెలిపారు. అయితే సోషల్ మీడియాలో వ్యాపిస్తున్న ఈ ఘటన యదార్థతపై ఇంకా అధికారిక సమాచారం పూర్తిగా ధృవీకరించబడలేదు.
Leave a Reply