చెన్నై: తమిళ సినీ పరిశ్రమలో అగ్ర నటుడిగా ఎన్నో విజయవంతమైన చిత్రాలను అందించిన రజనీకాంత్, 75 ఏళ్లు దాటినా నేటికీ కుర్ర హీరోలకు గట్టి పోటీనిస్తూ వరుస సినిమాలతో దూసుకుపోతున్నారు. ఆయనలాగే సంగీత ప్రపంచంలో తనకంటూ ఒక ముద్ర వేసుకున్న వారు ఇళయరాజా. వీరిద్దరి కలయికలో ఎన్నో సూపర్ హిట్ సినిమాలు వచ్చాయి. కానీ, 1994 తర్వాత వీరిద్దరూ కలిసి పనిచేయలేదు.
రజనీకాంత్ మరియు ఇళయరాజా కాంబినేషన్ తమిళ సినిమాలో ఒక ‘స్వర్ణయుగం’ అని చెప్పవచ్చు. వీరి మధ్య స్నేహం కేవలం వెండితెరకే పరిమితం కాకుండా చాలా లోతైనది. అయితే, 1994లో వచ్చిన ‘వీరా’ సినిమా తర్వాత ఈ మెగా కాంబినేషన్ మళ్లీ కలవలేదు. దీనికి గల కారణాలను ఇళయరాజా సోదరుడు, దర్శకుడు గంగై అమరన్ ఒక ఇంటర్వ్యూలో బహిరంగంగా పంచుకున్నారు.
‘బాషా’ సినిమాతో మొదలైన దూరం
రజనీకాంత్ కెరీర్‌లో మైలురాయిగా నిలిచిన ‘బాషా’ సినిమానే ఈ విభేదాలకు ప్రధాన కారణం. నిజానికి ఈ సినిమాకు ఇళయరాజానే సంగీతం అందించాల్సి ఉంది. కానీ పారితోషికం విషయంలో ఇళయరాజా అన్న ఒక మాట వివాదానికి దారితీసింది.
“మీకు కావాల్సింది మీరు సరిగ్గా తీసుకుంటున్నారు. నాకు కావాల్సింది నేను అడుగుతున్నాను. వారు ఇవ్వగలిగితే ఇవ్వనివ్వండి, లేదంటే వదిలేయండి” అని ఇళయరాజా అన్నారట.
ఈ ఒక్క మాట రజనీ మరియు రాజా మధ్య అవగాహన లోపానికి కారణమైంది. ‘బాషా’ సినిమా కచ్చితంగా తనకే వస్తుందని ఇళయరాజా నమ్మకంతో ఉన్నారు. కానీ, చిత్ర బృందం అనూహ్యంగా సంగీత దర్శకుడిని మార్చాలని నిర్ణయించుకుంది.
రజనీ చుట్టూ ఉన్నవారి సలహాలు
‘బాషా’ సినిమాకు ఇళయరాజా వద్దు అని నిర్మాత పట్టుబట్టారు. ఈ విషయాన్ని ఇళయరాజాకు ఎలా చెప్పాలో తెలియక రజనీకాంత్ ఇబ్బంది పడ్డారు. అదే సమయంలో ఇతర సంగీత దర్శకులు (దేవా వంటి వారు) భారీ విజయాలను అందుకుంటున్నారు. ఇళయరాజాతో పోలిస్తే మిగిలిన వారు తక్కువ బడ్జెట్‌లో అద్భుతమైన సంగీతాన్ని అందిస్తున్నారు.
దీంతో రజనీకాంత్ చుట్టూ ఉన్న వారు, “సార్, ఇది కూడా బాగుంది కదా.. దీన్నే కొనసాగిద్దాం” అని సలహా ఇవ్వడంతో మళ్లీ ఇళయరాజాను సంప్రదించే అవకాశం కలగలేదని గంగై అమరన్ తెలిపారు.
ఇళయరాజా తర్వాత రజనీకాంత్.. దేవా, ఏఆర్ రెహమాన్ వంటి వారితో పనిచేశారు. ప్రస్తుతం తన లేటెస్ట్ సినిమాలకు అనిరుధ్‌తో కలిసి పనిచేస్తున్న సంగతి తెలిసిందే.