పశ్చిమ బెంగాల్ బీజేపీ: పశ్చిమ బెంగాల్ రాజకీయాల్లో పెను మార్పు చోటుచేసుకుంది. రాష్ట్ర చరిత్రలో తొలిసారిగా భారతీయ జనతా పార్టీ ప్రభుత్వం కొలువుదీరింది. బీజేపీ నేత సువేందు అధికారి ముఖ్యమంత్రిగా ప్రమాణ స్వీకారం చేశారు.
ఆయనతో పాటు పార్టీ సీనియర్ నేతలు దిలీప్ ఘోష్, అగ్నిమిత్ర పాల్ సహా మరో ఐదుగురు నేతలు మంత్రులుగా బాధ్యతలు స్వీకరించారు. ఈ ప్రమాణ స్వీకార వేడుకలో ప్రధానమంత్రి నరేంద్ర మోదీ కూడా పాల్గొన్నారు. ఈ సందర్భంగా ప్రధాని మోదీ వేదికపై నుండి ప్రజలకు దండవత్ ప్రణామం (సాష్టాంగ నమస్కారం) చేశారు. ఆయన చేసిన ఈ పని అక్కడికి వచ్చిన ప్రజల్లో ఎంతో ఉత్సాహాన్ని నింపింది. ఈ వేడుకకు సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.
మరోవైపు, పశ్చిమ బెంగాల్ రాజకీయాల్లో ఇదొక చారిత్రాత్మక ఘట్టమని బీజేపీ మద్దతుదారులు అభివర్ణించారు. ప్రజలు మార్పు కోసం బీజేపీపై నమ్మకం ఉంచారని, రాష్ట్ర అభివృద్ధి కోసం ప్రభుత్వం వేగంగా పనిచేస్తుందని పార్టీ నేతలు పేర్కొన్నారు.
97 ఏళ్ల వృద్ధ నేత ఆశీర్వాదం తీసుకున్న ప్రధాని
అంతకుముందు, కోల్కతాలో జరిగిన ఈ వేడుకలో ప్రధానమంత్రి నరేంద్ర మోదీ 97 ఏళ్ల ఓ వృద్ధుడి ఆశీర్వాదం తీసుకున్నారు. ఎంతో ఉద్వేగభరితమైన ఆ క్షణంలో ప్రధాని మోదీ ఆయనను ఆలింగనం చేసుకుని, పాదాలకు నమస్కరించారు. ఆయన మరెవరో కాదు, సిలిగురికి చెందిన మఖన్లాల్ సర్కార్. బీజేపీ తొలినాళ్ల నుండి రాష్ట్రంలో పార్టీని నిర్మించిన సీనియర్ నేతలలో ఆయన ఒకరు.
బెంగాల్ బీజేపీ అధ్యక్షుడు సమిక్ భట్టాచార్య మాట్లాడుతూ.. మఖన్లాల్ సర్కార్ జనసంఘ్ స్థాపకుడు శ్యామా ప్రసాద్ ముఖర్జీకి అత్యంత సన్నిహితుడని తెలిపారు. “కాశ్మీర్ జైలులో ముఖర్జీ రహస్యంగా హత్యకు గురైనప్పుడు, ఆయన అంతిమ యాత్రలో పాల్గొన్న మఖన్లాల్ సర్కార్ నేడు ఇక్కడ ఉండటం మాకు గర్వకారణం” అని ఆయన అన్నారు. బ్రిగేడ్ పరేడ్ గ్రౌండ్లో ప్రమాణ స్వీకారానికి ముందు ప్రధాని మోదీ మఖన్లాల్ను సత్కరించారు.
ఆసక్తికరమైన గతం: కోర్టులో దేశభక్తి గీతం
కాంగ్రెస్ అధికారంలో ఉన్న సమయంలో దేశభక్తి గీతం పాడినందుకు మఖన్లాల్ను ఢిల్లీ పోలీసులు అరెస్ట్ చేశారని భట్టాచార్య గుర్తు చేశారు. కోర్టులో ఆయనను క్షమాపణలు చెప్పమని కోరగా.. ఆయన నిరాకరించారు. “నేను ఎటువంటి నేరం చేయలేదు, కేవలం పాట మాత్రమే పాడాను” అని ఆయన జడ్జికి చెప్పారు. ఆ పాట వినాలనుందని జడ్జి కోరడంతో ఆయన కోర్టులోనే మళ్ళీ పాడారు. అది విన్న జడ్జి మఖన్లాల్ను విడుదల చేయడమే కాకుండా, ఆయన ఇంటికి వెళ్ళడానికి ఫస్ట్ క్లాస్ టికెట్ మరియు ప్రయాణ ఖర్చుల కోసం 100 రూపాయలు ఇవ్వాలని పోలీసులను ఆదేశించారు.