పాకిస్థాన్‌తో ఘర్షణలు తలెత్తితే భారత్‌కు మద్దతు ఇవ్వబోమని అమెరికా స్పష్టం చేసినట్లు సమాచారం. ఈ విషయాన్ని అమెరికా ఇప్పటికే భారత్‌కు తెలియజేసిందని ‘సండే గార్డియన్’ నివేదించింది. సైనిక పరమైన చిక్కుల్లో అమెరికా భారత్‌కు నమ్మదగిన భాగస్వామిగా ఉండలేదనే నిజాన్ని ఈ పరిణామం స్పష్టం చేస్తోందని నిపుణులు అభిప్రాయపడుతున్నారు.
అమెరికా తన జాతీయ ప్రయోజనాలకు అనుగుణంగానే నిర్ణయాలు తీసుకుంటుందని ఆ దేశ అధికారులు భారత్‌కు తెలిపినట్లు నివేదిక పేర్కొంది. అమెరికా యొక్క ఇండో-పసిఫిక్ విధానంలో భారత్ కీలక పాత్ర పోషిస్తున్నప్పటికీ, పాకిస్థాన్‌తో యుద్ధం విషయంలో మాత్రం భారత్ మద్దతు ఆశించకూడదని తెలుస్తోంది. కఠినమైన జాతీయ ప్రాధాన్యతల కంటే అంతర్జాతీయ నిబంధనలకే తాము ప్రాముఖ్యత ఇస్తామని అమెరికా పేర్కొంది.
గతంలో ‘ఆపరేషన్ సింధూర్’ సమయంలో కూడా భారత్‌కు మద్దతు ఇవ్వడానికి అమెరికా నిరాకరించింది. అయితే, కాల్పుల విరమణకు తామే చొరవ తీసుకున్నామని డోనాల్డ్ ట్రంప్ అప్పట్లో చెప్పుకున్నారు. అమెరికా అనుసరిస్తున్న ఇటువంటి ద్వంద్వ విధానాల వల్లే భారత్ రక్షణ సహకారం కోసం ఫ్రాన్స్, రష్యా వంటి దేశాలపై ఎక్కువగా ఆధారపడుతోందని నిపుణుల విశ్లేషణ.
ద్వంద్వ నీతి ఎప్పుడూ ఉంటుంది: 2019లో జరిగిన భారత్-పాక్ ఘర్షణల సమయంలో పాకిస్థాన్ తన ఎఫ్-16 (F-16) ఫాల్కన్ యుద్ధ విమానాలను మోహరించింది. పాకిస్థాన్ ఆత్మరక్షణ కోసం, అంతర్గత అవసరాల కోసం మాత్రమే అమెరికా ఈ విమానాలను ఇచ్చింది. అమెరికా అనుమతి లేకుండా పాకిస్థాన్ వీటిని భారత్‌కు వ్యతిరేకంగా వాడటం సాధ్యం కాదు. చైనాను అడ్డుకోవడానికి భారత్‌ను ఒక ఆయుధంగా అమెరికా వాడుకుంటున్నప్పటికీ, పాకిస్థాన్‌ను పూర్తిగా వదిలేయడానికి సిద్ధంగా లేదని నిపుణులు భావిస్తున్నారు.