పాకిస్థాన్‌లో గ్యాస్ సిలిండర్ ధర రూ.10,000 దాటింది.! వంట చేయడానికే ఇంత ఖర్చా.? తీవ్ర దిగ్భ్రాంతిలో ప్రజలు.!!

పాకిస్థాన్‌లో వంట గ్యాస్ సిలిండర్ ధరలు విపరీతంగా పెరగడంతో అక్కడి ప్రజలు తీవ్ర దిగ్భ్రాంతికి గురవుతున్నారు.

కొన్ని ప్రాంతాల్లో 12 కిలోల ఎల్పీజీ సిలిండర్ ధర ఏకంగా 10,000 పాకిస్థాన్ రూపాయలకు చేరుకున్నట్లు నివేదికలు తెలుపుతున్నాయి. ఇరాన్‌తో సరిహద్దు రవాణాలో తలెత్తిన ఆటంకాల వల్ల గ్యాస్ దిగుమతులు ప్రభావితమై, తీవ్ర కొరత ఏర్పడిందని చెబుతున్నారు.

పాకిస్థాన్, ప్రతిరోజూ ఇరాన్ నుండి సుమారు 7,000 టన్నుల ఎల్పీజీ గ్యాస్‌ను దిగుమతి చేసుకుంటుంది. అయితే, అక్టోబర్ 17వ తేదీన గబ్ద్-రిమ్దాన్ (Gabd-Rimdan) మరియు తఫ్తాన్ (Taftan) వంటి ప్రధాన సరిహద్దు చెక్‌పోస్ట్‌లను మూసివేయడంతో గ్యాస్ సరఫరాకు తీవ్ర అంతరాయం ఏర్పడింది. భద్రతా కారణాల దృష్ట్యా, అక్రమ రవాణాను అరికట్టేందుకే సరిహద్దును మూసివేశామని పాకిస్థాన్ వర్గాలు తెలిపాయి. అదే సమయంలో, సాంకేతిక కారణాల వల్ల ఈ అంతరాయం ఏర్పడిందని ఇరాన్ చెబుతోంది.

దీని కారణంగా, గతంలో 4,500 పాకిస్థాన్ రూపాయలకు విక్రయించిన 12 కిలోల సిలిండర్ ధర.. ఇప్పుడు బలూచిస్థాన్‌లో సుమారు 7,000 రూపాయలకు, లాహోర్‌లో 7,500 రూపాయలకు, స్కార్దు ప్రాంతంలో 8,200 రూపాయలకు పెరిగిందని వ్యాపారులు తెలిపారు. కొన్ని ప్రాంతాల్లో సిలిండర్ ధర రూ.10,000 వరకు కూడా వెళ్లినట్లు సమాచారం. గ్యాస్‌ను తరలిస్తున్న వందలాది లారీలు సరిహద్దు ప్రాంతాల్లో నిలిచిపోవడంతో గ్యాస్ పంపిణీని చక్కదిద్దడంలో తీవ్ర ఇబ్బందులు ఎదురవుతున్నాయి.

ఈ గ్యాస్ కొరత ఇలాగే కొనసాగితే ధరలు మరింత పెరిగే అవకాశం ఉందని వ్యాపారులు హెచ్చరిస్తున్నారు. ముఖ్యంగా, శీతాకాలం సమీపిస్తుండటంతో గ్యాస్‌కు డిమాండ్ పెరుగుతుందన్న ఆందోళన నెలకొంది. వంటగ్యాస్ ధరల పెరుగుదల ప్రభావం ఇతర నిత్యావసర వస్తువుల ధరలపై కూడా పడే అవకాశం ఉండటంతో ప్రజలు ఆందోళన చెందుతున్నారు. ఇరాన్‌తో సరిహద్దు వాణిజ్యం మళ్లీ ఎప్పుడు కుదుటపడుతుందా, గ్యాస్ సరఫరా ఎప్పుడు సాధారణ స్థితికి చేరుకుంటుందా అని పాకిస్థాన్ ప్రజలు ఆశగా ఎదురుచూస్తున్నారు.