ఖైబర్ పఖ్తుంఖ్వా: లష్కరే తోయిబా చీఫ్ హఫీజ్ సయీద్కు మరో గట్టి ఎదురుదెబ్బ తగిలింది. పాకిస్థాన్లోని ఖైబర్ పఖ్తుంఖ్వా ప్రాంతంలో గుర్తుతెలియని ముష్కరులు జరిపిన కాల్పుల్లో లష్కరే కీలక కమాండర్ షేక్ యూసుఫ్ అఫ్రిదీ మరణించినట్లు భద్రతా వర్గాలు ధృవీకరించాయి.
నిషేధిత ఉగ్రవాద సంస్థకు చెందిన సీనియర్ నేతలే లక్ష్యంగా జరుగుతున్న వరుస దాడుల్లో అఫ్రిదీ హత్య తాజా పరిణామం. సమాచారం ప్రకారం, అపరిచితులు అకస్మాత్తుగా అఫ్రిదీపై తూటాల వర్షం కురిపించారు. తప్పించుకునే అవకాశం కూడా లేకుండా అతడు అక్కడికక్కడే ప్రాణాలు విడిచాడు. స్థానికులు అక్కడికి చేరుకునేలోపే దుండగులు ఆ ప్రాంతంలోని కొండల గుండా పారిపోయారు.
లష్కరే నెట్వర్క్లో కీలక వ్యక్తి: భద్రతా వర్గాల కథనం ప్రకారం, షేక్ యూసుఫ్ అఫ్రిదీ చాలా కాలంగా ఉగ్రవాద కార్యకలాపాల్లో చురుకుగా పాల్గొంటున్నాడు. లష్కరే తోయిబా సంస్థాగత నిర్మాణంలో అతడు కీలక పాత్ర పోషించేవాడు. హఫీజ్ సయీద్కు అత్యంత నమ్మకస్తుడైన కమాండర్గా పేరున్న అఫ్రిదీ, గత కొద్ది నెలలుగా తీవ్ర ఒత్తిడిని ఎదుర్కొంటున్నాడు.
పాకిస్థాన్లో లష్కరే ఉగ్రవాదుల హత్యలు ఒక పద్ధతి ప్రకారం జరుగుతున్నట్లు కనిపిస్తోంది. ఫిబ్రవరి 2025లో లష్కరే రాజకీయ విభాగం అధిపతి మరియు సయీద్ బావమరిది అయిన మౌలానా కాశిఫ్ అలీ కూడా స్వాబీలో గుర్తుతెలియని వ్యక్తుల చేతిలో హతమయ్యాడు. ఇప్పుడు అఫ్రిదీ మరణం లష్కరే కార్యకలాపాలకు పెద్ద విఘాతం కలిగిస్తుందని విశ్లేషకులు భావిస్తున్నారు.
దర్యాప్తు ప్రారంభం – కారణాలు అస్పష్టం: కాల్పుల అనంతరం భద్రతా దళాలు ఆ ప్రాంతాన్ని చుట్టుముట్టి సెర్చ్ ఆపరేషన్ ప్రారంభించాయి. ఫోరెన్సిక్ బృందాలు ఆధారాలు సేకరిస్తున్నాయి. అయితే, ఈ హత్యకు తామే బాధ్యులమని ఇప్పటివరకు ఏ సంస్థ ప్రకటించలేదు. అంతర్గత శత్రుత్వం లేదా ఇతర విదేశీ శక్తుల ప్రమేయం ఉందా అనే కోణంలో దర్యాప్తు జరుగుతోంది.