ఇరాన్ యుద్ధం భారత్లో మరో పెద్ద చమురు సంక్షోభానికి దారితీయవచ్చు. అయితే ఇది కేవలం పెట్రోల్ లేదా డీజిల్ గురించి మాత్రమే కాదు, ప్రస్తుతం తలెత్తిన మరో ప్రధాన సమస్య ‘పామాయిల్’. ప్రపంచంలోనే అత్యధికంగా పామాయిల్ను దిగుమతి చేసుకునే దేశం భారతదేశం.
భారత్ ఏటా సుమారు 9.5 మిలియన్ టన్నుల పామాయిల్ను వినియోగిస్తుంది. కానీ మన దేశంలో ఉత్పత్తి అయ్యేది కేవలం 4 లక్షల టన్నుల కంటే తక్కువ. అంటే దాదాపు వినియోగమంతా విదేశీ దిగుమతులపైనే ఆధారపడి ఉంది.
పామాయిల్ ఎందుకు దిగుమతి చేసుకుంటాం? పామాయిల్ ఉత్పత్తి చేసే తాటి చెట్లకు (Palm trees) నిరంతర వర్షపాతం, సమృద్ధిగా నీరు అవసరం. ఆగ్నేయాసియా దేశాలైన ఇండోనేషియా, మలేషియా దీనికి ప్రధాన కేంద్రాలు. భారత్ తన అవసరాల కోసం ప్రధానంగా ఈ రెండు దేశాల నుండే సుమారు 9 మిలియన్ టన్నుల పామాయిల్ను దిగుమతి చేసుకుంటుంది. భారత్లో మొత్తం వంట నూనెల వినియోగంలో పామాయిల్ వాటా 40%. ఇది ఇతర నూనెల కంటే చౌకగా ఉండటమే కాకుండా, ఎక్కువ కాలం నిల్వ ఉంటుంది.
మన నిత్య జీవితంలో పామాయిల్ పాత్ర: దేశంలోని సగం ఇళ్లలో పామాయిల్తో తయారు చేసిన ఆహారాన్ని తీసుకుంటారని అంచనా.
- ఆహార రంగం: చిప్స్, నమ్కీన్, సమోసాలు, వడలు, ఫ్రెంచ్ ఫ్రైస్, డోనట్స్, బిస్కెట్లు, కేకులు, ఇన్స్టంట్ నూడుల్స్, చాక్లెట్లు, ఐస్ క్రీమ్స్ – వీటన్నింటి తయారీలో పామాయిల్ వాడతారు. ఎందుకంటే ఇది ఆహారాన్ని ఎక్కువ సేపు కరకరలాడేలా ఉంచుతుంది. హోటళ్లు, రెస్టారెంట్లు, వీధి వ్యాపారులు ఎక్కువగా దీనినే ఉపయోగిస్తారు.
- సౌందర్య సాధనాలు & ఇతరాలు: సోపులు, షాంపూలు, బాడీ వాష్లలో వచ్చే నురుగుకు పామాయిల్ కారణం. క్రీములు, లోషన్లు, మాయిశ్చరైజర్లు, లిప్స్టిక్, టూత్పేస్ట్, సర్ఫ్ పౌడర్, చివరకు పెయింట్లలో కూడా దీనిని ఉపయోగిస్తారు.
ఇరాన్ యుద్ధానికి, దీనికి సంబంధం ఏమిటి? సాధారణంగా ఇండోనేషియా, మలేషియా నుండి వచ్చే నూనె హార్ముజ్ జలసంధి గుండా రావాల్సిన అవసరం లేదు. కానీ సమస్య ఏమిటంటే.. ఇరాన్ యుద్ధం వల్ల ప్రపంచవ్యాప్తంగా ముడి చమురు (Crude oil) ధరలు పెరిగిపోయాయి. దీనితో ఇండోనేషియా తన పామాయిల్ను విదేశాలకు అమ్మడం తగ్గించి, దానితో బయో డీజిల్ తయారు చేయాలని నిర్ణయించుకుంది.
- B50 ప్రోగ్రామ్: ఇండోనేషియా జూలై నుండి డీజిల్లో 50% పామాయిల్ను కలపనున్నట్లు (B50) ప్రకటించింది. గతంలో ఇది 40% (B40) ఉండేది. విదేశాల నుండి ఖరీదైన డీజిల్ను దిగుమతి చేసుకునే బదులు, తమ దేశంలోనే పండే పామాయిల్తో ఇంధనాన్ని తయారు చేసుకుని స్వయం సమృద్ధి సాధించాలని వారు భావిస్తున్నారు.
- భారత్పై ప్రభావం: ఇండోనేషియా ప్రపంచంలోనే అతిపెద్ద పామాయిల్ ఉత్పత్తిదారు. వారు తమ ఉత్పత్తిని సొంత ఇంధనం కోసం వాడుకుంటే, భారత్ వంటి దేశాలకు ఎగుమతులు తగ్గిపోతాయి. సరఫరా తగ్గితే ఆటోమేటిక్గా ధరలు ఆకాశాన్ని తాకుతాయి.
ముగింపు: మలేషియా కూడా ఇదే బాటలో పయనిస్తూ బయో డీజిల్ వాటాను పెంచుతోంది. ముడి చమురు ధరలు పెరుగుతున్నందున, ఈ దేశాలు పామాయిల్ను ‘వంట నూనె’ కంటే ‘ఇంధనం’గానే ఎక్కువగా చూడాలని నిర్ణయించుకున్నాయి. ఒకవేళ ఈ పరిస్థితి మరో 3-6 నెలలు కొనసాగితే, వంట నూనె ధరలతో పాటు బిస్కెట్లు, స్నాక్స్, సోపుల ధరలు కూడా విపరీతంగా పెరిగి సామాన్యుడి జేబుకు చిల్లు పడటం ఖాయం.