“పార్టీకి కలిసే వెళ్లారు.. తిరిగి వచ్చింది ఒంటరిగానేనా?” కేఫ్ యజమాని మృతి కేసులో మోడల్ కొత్త సీసీటీవీ (CCTV) దృశ్యాలు! 4వ అంతస్తు నుంచి పడటం ప్రమాదమేనా.!!!

లక్నోలో కేఫ్ యజమాని శివ శర్మ నాలుగో అంతస్తు నుంచి కిందపడి మృతి చెందిన కేసులో, మోడల్, సోషల్ మీడియా ఇన్‌ఫ్లుయెన్సర్ అయిన శ్రద్ధా దూబేకు సంబంధించిన కొత్త సీసీటీవీ (CCTV) దృశ్యాలు బయటపడ్డాయి.

ఒక వీడియోలో.. లేట్ నైట్ పార్టీ ముగిసిన తర్వాత తెల్లవారుజామున శ్రద్ధా దూబే ఒంటరిగా అపార్ట్‌మెంట్ కాంప్లెక్స్‌కు తిరిగి వస్తున్న దృశ్యాలు ఉన్నట్లు సమాచారం. మరో వీడియోలో.. ఆగస్టు 4వ తేదీన శ్రద్ధా దూబే, శివ శర్మ చేతులు పట్టుకుని మెట్లు దిగుతుండగా, వారితో పాటు శ్రద్ధా సోదరి రష్మీ దూబే కూడా వెళ్తున్న దృశ్యాలు రికార్డైనట్లు చెబుతున్నారు.

ఈ క్రమంలో, లక్నోలోని హజ్రత్‌గంజ్ ప్రాంతంలో ఉన్న అవధ్ గ్రీన్ అపార్ట్‌మెంట్‌లో మే నెలలో రికార్డైనట్లు భావిస్తున్న మరో సీసీటీవీ ఫుటేజ్ కూడా వెలుగులోకి వచ్చింది. అందులో శివ శర్మ, శ్రద్ధా దూబే, రష్మీ దూబే అపార్ట్‌మెంట్ ప్రాంగణంలో ఉన్న దృశ్యాలున్నట్లు సమాచారం. ఈ వీడియోలు ప్రస్తుతం సోషల్ మీడియాలో వైరల్‌గా మారాయి. అయితే, కేవలం ఈ దృశ్యాలు మాత్రమే శివ శర్మ మరణానికి గల కారణాలను నిర్ధారించలేవు కాబట్టి, వాటికి సంబంధించిన ఇతర ఆధారాలను కూడా పోలీసులు క్షుణ్ణంగా పరిశీలిస్తున్నారు.

గత అక్టోబర్ 9న లక్నోలోని ఓ అపార్ట్‌మెంట్ నాలుగో అంతస్తు నుంచి కిందపడి శివ శర్మ మృతి చెందాడు. అయితే, తన కుమారుడు చనిపోవడానికి ముందు వేధింపులు, దాడులు, బెదిరింపులు ఎదుర్కొన్నాడని అతని తల్లి రంజనా శర్మ తన ఫిర్యాదులో ఆరోపించారు. అంతేకాకుండా, శివ శర్మను ఎవరైనా కిందకు నెట్టేసి ఉంటారని కుటుంబ సభ్యులు అనుమానం వ్యక్తం చేస్తున్నారు. దీంతో శ్రద్ధా దూబే, ఆమె సోదరి రష్మీ దూబే, డ్రైవర్‌తో పాటు మరికొందరిపై పోలీసులు హత్య కేసు నమోదు చేసినట్లు వార్తలు తెలుపుతున్నాయి.

కానీ, శివ శర్మ ఆత్మహత్య చేసుకున్నాడని శ్రద్ధా దూబే వాదిస్తోంది. శివ శర్మకు రూ. 15 లక్షల నుంచి రూ. 20 లక్షల వరకు అప్పులు ఉన్నాయని, అతడు కిందకు దూకడం తాను కళ్లారా చూశానని శ్రద్ధా ఇటీవల విడుదల చేసిన వీడియోల్లో పేర్కొన్నట్లు సమాచారం. అలాగే, సుమారు రూ. 6 లక్షల విలువైన బంగారు ఆభరణాల విషయంలో వీరిద్దరి మధ్య తీవ్ర వాగ్వాదం జరిగినట్లు చెబుతున్న పాత వీడియో ఒకటి కూడా బయటపడింది. ప్రస్తుతం సీసీటీవీ ఫుటేజీలు, సాక్షుల వాంగ్మూలాలు, పోస్టుమార్టం నివేదికలు, ఫోరెన్సిక్ ఆధారాలను పోలీసులు ముమ్మరంగా దర్యాప్తు చేస్తున్నారు. శివ శర్మ మృతి ఆత్మహత్యా, ప్రమాదమా లేదా ఉద్దేశపూర్వకంగా చేసిన హత్యా అనేది పోలీసుల విచారణ పూర్తయిన తర్వాతే తేలనుంది.