“పిల్లి ఎదురురావడం వెనుక ఉన్న ‘సైన్స్’ ఏంటి? మన దేశంలో అశుభం.. మరి విదేశాల్లో?”

ఏదైనా శుభ కార్యానికి బయలుదేరినప్పుడు పిల్లి అడ్డం వస్తే చాలు, చాలా మందికి గుండె గుభేల్ మంటుంది. ముఖ్యంగా నల్ల పిల్లి కనిపిస్తే ఆ రోజు పని ఇక ముగిసిందని భావించి దారి మార్చుకునే వారే ఎక్కువ. అయితే, పిల్లి అడ్డం రావడం నిజంగా అపశకునమేనా? లేక దీని వెనుక మరేదైనా కారణం ఉందా?

ప్రపంచవ్యాప్తంగా పిల్లుల గురించి ఉన్న వివిధ నమ్మకాలపై ప్రత్యేక కథనం:

భారతీయ నమ్మకం: రాహువు వాహనం మన దేశంలో నలుపు రంగును శని దేవుడి సంకేతంగా పరిగణిస్తారు. జ్యోతిష్య శాస్త్రం ప్రకారం, పిల్లిని రాహువు వాహనంగా నమ్ముతారు. రాహువు అశుభ ఫలితాలను ఇస్తాడనే నమ్మకం ఉండటం వల్ల, పిల్లి దారి దాటినప్పుడు అక్కడ కాసేపు ఆగడం లేదా దారి మార్చుకోవడం ఆచారంగా మారింది.

పాత కాలపు ‘సిగ్నల్’ ఇప్పుడు మూఢనమ్మకంగా మారిందా? పూర్వ కాలంలో ప్రజలు అడవి దారుల్లో ఎడ్ల బండ్లు లేదా గుర్రాలపై ప్రయాణించేవారు. పిల్లులకు ఆరో ప్రాణం (Sixth Sense) ఉంటుందని, అవి వన్యప్రాణుల రాకను ముందుగానే గుర్తిస్తాయని నమ్మేవారు. అడవి పిల్లి దారి దాటిందంటే, దాని వెనుక చిరుత పులి లేదా పులి వచ్చే అవకాశం ఉందని భావించి ప్రయాణికులు అక్కడ ఆగిపోయేవారు. కాలక్రమేణా ఆ ‘రక్షణ చర్యే’ మూఢనమ్మకంగా మారిందని నిపుణులు వివరిస్తున్నారు.

ప్రపంచవ్యాప్తంగా ఉన్న వివిధ నమ్మకాలు: ఆశ్చర్యకరమైన విషయం ఏమిటంటే, నల్ల పిల్లి అన్ని చోట్లా అశుభం కాదు:

• ఈజిప్ట్: ఇక్కడ నల్ల పిల్లిని అదృష్ట దేవతగా పూజిస్తారు.
• బ్రిటన్ మరియు జపాన్: ఇక్కడ నల్ల పిల్లి దారికి అడ్డం వస్తే అదృష్టం వరిస్తుందని సంబరపడతారు.
• ఫ్రాన్స్: ఫ్రాన్స్‌లో దీనిని ‘మనీ క్యాట్’ లేదా ‘మ్యాజిక్ క్యాట్’ అని పిలుస్తారు.
• నావికులు: సముద్ర ప్రయాణం చేసే నావికులు తమ ప్రయాణం సురక్షితంగా సాగాలని ఓడల్లో నల్ల పిల్లులను ఉంచుకునేవారు.

ఇతర జంతువులపై నమ్మకాలు: కేవలం పిల్లే కాదు, ప్రయాణ సమయంలో పాము ఎదురైతే ప్రమాద సూచన అని, కాకి వరుసగా అరిస్తే మరణ వార్త అని, లేదా కుక్కలు నిరంతరం మొరుగుతుంటే రాబోయే గండానికి సంకేతమని పలు చోట్ల నమ్ముతుంటారు.