భోపాల్: మధ్యప్రదేశ్ రాష్ట్రం సాగర్ జిల్లాలోని ఖురాయ్ ప్రాంతంలో ఒక ఘోరమైన ఘటన వెలుగుచూసింది. పెళ్లి వేదికపై వధూవరులిద్దరూ పూలదండలు మార్చుకునే వేడుక పూర్తయిన తర్వాత, తాము అడిగిన కట్నం ఇవ్వలేదనే ఆగ్రహంతో వధువు కుటుంబీకులతో గొడవ పడి, వరుడి తరఫు వారు అక్కడి నుండి కటకటాల వెనక్కి వెళ్లేలా ఒక షాకింగ్ ఘటన కలకలం రేపింది.
తల్లిదండ్రులు లేకపోవడంతో తన మేనమామ, అమ్మమ్మల పెంపకంలో పెరిగిన నిషా బన్సల్ అనే యువతికి.. సురేంద్ర బన్సల్ అనే వ్యక్తితో బంధుమిత్రుల సమక్షంలో ఎంతో వైభవంగా వివాహ ఏర్పాట్లు జరిగాయి. పెళ్లి రోజున వేదికపై డిజిటల్ మ్యూజిక్ హోరు నడుమ వధూవరులిద్దరూ ఉత్సాహంగా పూలదండలు మార్చుకున్నారు. ఆ తర్వాత తదుపరి పెళ్లి తంతు కోసం వధువు సిద్ధమైంది.
అకస్మాత్తుగా బైక్, నగదు కోసం డిమాండ్ – దాడి:
అయితే, సరిగ్గా అదే సమయంలో వరుడి తరఫు వారు అకస్మాత్తుగా తమకు రూ. 2 లక్షల నగదుతో పాటు ఒక బైక్ (మోటార్ సైకిల్) తక్షణమే అదనపు కట్నంగా ఇవ్వాలని మొండికేసి పెద్ద పంచాయితీ పెట్టారు. వధువు మేనమామ తమ శక్తి కొద్దీ అన్ని లాంఛనాలు, కట్నకానుకలు సమర్పించామని సర్దిచెప్పేందుకు ప్రయత్నించాడు. కానీ, ఆగ్రహంతో ఊగిపోయిన వరుడు.. తన తలపాగాను కిందకు విసిరేసి, వధువు కుటుంబ సభ్యులపై దారుణంగా దాడికి దిగాడు.
అంతటితో ఆగకుండా, అర్ధరాత్రి వేళ పెళ్లిని పూర్తిగా ముగించకుండానే, బరాత్తో (బంధుగణంతో) సహా ఆ కట్న పిశాచులు అక్కడి నుండి సర్దుకుని పరారయ్యారు.
న్యాయం కోసం నిలబడిన వధువు – పోలీసు కేసు:
చేతులకు పండిన మెహందీతో, పెళ్లి పట్టుచీరలోనే రాత్రంతా కన్నీరు మున్నీరుగా వరుడు తిరిగి వస్తాడేమో అని ఆశగా ఎదురుచూసిన నిషాకు నిరాశే ఎదురైంది. దీంతో ఆమె మరుసటి రోజు ఉదయం నేరుగా ఖురాయ్ పోలీస్ స్టేషన్కు వెళ్లి ఫిర్యాదు చేసింది.
“ఇకపై ఆ కట్న పిశాచితో నాకు పెళ్లి వద్దు.. నాకు న్యాయం మాత్రమే కావాలి” అని ఆ యువతి ఎంతో ధైర్యంగా గళం విప్పింది. దీనిపై స్పందించిన పోలీస్ ఇన్స్పెక్టర్ యోగేంద్ర సింగ్ డాంగి ఆదేశాల మేరకు.. వరుడు, అతని తండ్రి, మరియు సోదరుడిపై వరకట్న నిషేధ చట్టం కింద పోలీసులు కేసు నమోదు చేసి ముమ్మర దర్యాప్తు జరుపుతున్నారు.