వాషింగ్టన్: ఇరాన్ విషయంలో దూకుడుగా వ్యవహరించవద్దని అమెరికా రక్షణ శాఖ ప్రధాన కార్యాలయం ‘పెంటగన్’ ట్రంప్‌ను ముందే హెచ్చరించింది. కానీ ట్రంప్ ఆ హెచ్చరికలను తన అలవాటు ప్రకారం తేలికగా తీసుకున్నారు. ఇప్పుడు పెంటగన్ చెప్పినట్లే జరగడంతో, సొంత దేశంలోనే ట్రంప్‌పై విమర్శలు వెల్లువెత్తుతున్నాయి.
ట్రంప్ అమెరికా అధ్యక్షుడై ఉండవచ్చు.. కానీ ఏదైనా యుద్ధానికి వెళ్లేముందు సైన్యంతో సంప్రదింపులు జరపాలి. అటువంటి సమావేశాల్లో పెంటగన్ ఇచ్చిన హెచ్చరికలను ట్రంప్ పట్టించుకోలేదు. ఫలితంగా ఇప్పుడు పరిస్థితి అదుపు తప్పిందని ‘వాల్ స్ట్రీట్ జర్నల్’ పేర్కొంది.
పెంటగన్ అధికారులు ఏమని హెచ్చరించారు?
- JCS అధికారులు: అమెరికా సైన్యంలోని త్రివిధ దళాల (ఆర్మీ, నేవీ, ఎయిర్ ఫోర్స్) ఉమ్మడి బృందం ట్రంప్‌ను హెచ్చరించింది. వీరు ప్రపంచవ్యాప్త యుద్ధ పరిస్థితులను అంచనా వేసి, ఆయుధాల నిల్వల గురించి హెచ్చరికలు జారీ చేసే నిపుణులు.
- CENTCOM అధికారులు: ఖతార్, ఇరాక్, సౌదీ అరేబియా వంటి మధ్యప్రాచ్య దేశాల భద్రతను పర్యవేక్షించే విభాగం ఇది. దీని ప్రధాన కేంద్రం ఫ్లోరిడాలో ఉన్నప్పటికీ, కార్యకలాపాలు ఖతార్ నుండి జరుగుతాయి.
హెచ్చరికలను పట్టించుకోని ట్రంప్:
ఈ రెండు విభాగాలు ట్రంప్‌ను ముందే హెచ్చరించాయి. ఇరాన్‌తో యుద్ధానికి దిగితే, ఆ దేశం హోర్ముజ్ జలసంధిని మూసివేస్తుందని తెలిపాయి. అయితే, అమెరికా సైనిక శక్తిని చూసి ఇరాన్ భయపడుతుందని, ఒకవేళ మూసివేసినా మనం తిరిగి తెరిపించవచ్చని ట్రంప్ ధీమా వ్యక్తం చేశారు.
ప్రస్తుత పరిస్థితి:
గత 13 రోజులుగా హోర్ముజ్ జలసంధి మూసివేయబడి ఉంది. ప్రపంచ చమురు సరఫరాలో 20-30% ఈ మార్గం ద్వారానే జరుగుతుంది. ఇది మూతపడటంతో భారత్ వంటి దేశాల్లో ఇంధన సమస్యలు తలెత్తాయి. మరోవైపు, అమెరికా బలగాల వద్ద ఉన్న ఆయుధాలు వేగంగా అయిపోతున్నాయి. వీటిని తిరిగి ఉత్పత్తి చేయడానికి చాలా నెలల సమయం పడుతుంది. ఈ క్రమంలో ఇజ్రాయెల్‌ను రక్షించడం అమెరికాకు కష్టతరం కావచ్చు.
హోర్ముజ్ జలసంధి గుండా ప్రయాణించే నౌకలకు భద్రత కల్పించలేమని అమెరికా ఇప్పటికే ప్రకటించడం గమనార్హం. పెంటగన్ హెచ్చరికల వివరాలు ‘వాల్ స్ట్రీట్ జర్నల్’ ద్వారా బయటకు రావడంతో అమెరికాలోనే ట్రంప్‌కు వ్యతిరేకంగా నిరసనలు పెరుగుతున్నాయి.