పెంపుడు జంతువుల యజమానులారా జాగ్రత్త! తన పెంపుడు కుక్క గోకడం వల్ల 9వ తరగతి విద్యార్థిని ప్రాణాలు కోల్పోయింది. ఆమె తల్లిదండ్రులు మృతదేహాన్ని కూడా తీసుకెళ్లలేదు. ఇది ఒక దిగ్భ్రాంతికరమైన సంఘటన.

పెంపుడు కుక్క గోరుతో గీరినప్పుడు నిర్లక్ష్యం చేయడం వల్ల రేబిస్ వ్యాధి సోకి తొమ్మిదో తరగతి చదువుతున్న విద్యార్థిని మరణించిన ఘటన తమిళనాడు తూత్తుకుడి జిల్లాలో తీవ్ర విషాదాన్ని నింపింది.

తూత్తుకుడి జిల్లా ఓట్టపిడారం సమీపంలోని ఒక గ్రామానికి చెందిన సెల్వ సుహాసిని అనే బాలిక 9వ తరగతి చదువుతోంది. రెండు నెలల క్రితం తన ఇంట్లోని పెంపుడు కుక్కతో ఆడుకుంటుండగా, అనుకోకుండా ఆ కుక్క గోరు బాలిక శరీరపై గీరింది. అది కేవలం చిన్న గాయమే అని భావించిన బాలిక లేదా ఆమె తల్లిదండ్రులు, ప్రారంభంలో సరైన వైద్య చికిత్స గానీ లేదా యాంటీ-రేబిస్ వ్యాక్సిన్ గానీ తీసుకోలేదు.

ఈ క్రమంలో, గత కొన్ని రోజులుగా సుహాసిని అనారోగ్యానికి గురైంది. రేబిస్ లక్షణాలు కనిపించడంతో ఆమెను చికిత్స నిమిత్తం మదురై ప్రభుత్వ ఆసుపత్రిలో చేర్పించారు. అక్కడ తీవ్ర ప్రయత్నాలు చేసినప్పటికీ ఫలితం లేకుండా, గత నెల 30వ తేదీన ఆ బాలిక కన్నుమూసింది.

రేబిస్ వ్యాధి తీవ్రత మరియు సంక్రమణ ప్రమాదాన్ని దృష్టిలో ఉంచుకుని, బాలిక మృతదేహాన్ని తల్లిదండ్రులకు అప్పగించలేదు. ప్రభుత్వ నిబంధనల ప్రకారం అధికారులే బాలిక అంత్యక్రియలు నిర్వహించారు. కుక్క కరిస్తేనే రేబిస్ వస్తుందనేది తప్పుడు అంచనా అని వైద్యులు హెచ్చరిస్తున్నారు.

దీనిపై వైద్యులు మాట్లాడుతూ.. “కుక్కలు తమ శరీరాన్ని నాక్కున్నప్పుడు వాటి లాలాజలం గోర్లకు అంటుకుంటుంది. కుక్క గోరుతో గీరినప్పుడు ఆ లాలాజలం రక్తంలో కలిస్తే, రేబిస్ వైరస్ శరీరంలోకి ప్రవేశించే అవకాశం ఉంది. కాబట్టి పెంపుడు కుక్కే కదా అని నిర్లక్ష్యం చేయకుండా, అది గీరిన వెంటనే ప్రభుత్వ ఆసుపత్రికి వెళ్లి వ్యాక్సిన్ వేయించుకోవడం ప్రాణ రక్షణకు అత్యవసరం” అని తెలిపారు. ఈ ఘటన ఆ ప్రాంతంలో విషాదాన్ని నింపడమే కాకుండా, పెంపుడు జంతువులు ఉన్న వారిలో అవగాహన కలిగించింది.