రాంపూర్: ఉత్తరప్రదేశ్ రాంపూర్ జిల్లాలో ఒక ఆశ్చర్యకరమైన ఘటన వెలుగులోకి వచ్చింది. ఒక యువకుడికి వివాహం జరిగిన కొద్ది గంటలకే, అతని భార్య పండంటి ఆడబిడ్డకు జన్మనిచ్చింది. ఈ వార్త ఇప్పుడు ఆ ప్రాంతంలో చర్చనీయాంశమైంది.
అసలేం జరిగింది? అజీమ్ నగర్ పోలీస్ స్టేషన్ పరిధిలోని కుమ్హారియా గ్రామానికి చెందిన యువకుడికి, బహదూర్‌గంజ్ గ్రామానికి చెందిన యువతికి ఆరు నెలల క్రితం నిశ్చితార్థం జరిగింది. ఏడాది తర్వాత పెళ్లి చేసుకోవాలని పెద్దలు నిర్ణయించారు. అయితే, హఠాత్తుగా ఆ యువతి పోలీస్ స్టేషన్‌కు వెళ్లి, తన నిశ్చితార్థం జరిగిన యువకుడితో వెంటనే పెళ్లి చేయాలని పట్టుబట్టింది. పోలీసులు ఇరు వర్గాల పెద్దలను పిలిపించి మాట్లాడగా, శనివారం రాత్రి 8 గంటల సమయంలో ఇరు కుటుంబాలు అంగీకారానికి వచ్చాయి.
ఆ తర్వాత వరుడు ఐదుగురిని వెంటబెట్టుకుని వెళ్లి, రాత్రి 9 గంటల సమయంలో వధువును తన ఇంటికి తీసుకువచ్చాడు. అయితే, రాత్రి 12 గంటల సమయంలో వధువుకు కడుపునొప్పి రావడంతో కంగారుపడిన కుటుంబ సభ్యులు లేడీ డాక్టర్‌ను పిలిపించారు. ఆదివారం తెల్లవారుజామున ఆమె ఒక ఆడబిడ్డకు జన్మనిచ్చింది.
వరుడి స్పందన: సాధారణంగా ఇలాంటి సందర్భాల్లో గొడవలు జరుగుతుంటాయి, కానీ ఇక్కడ సీన్ రివర్స్ అయింది. పెళ్లయిన 6 గంటలకే బిడ్డ పుట్టినప్పటికీ, వరుడు ఏమాత్రం కోప్పడకుండా ఆ బిడ్డను తన బిడ్డగానే అంగీకరించి, గ్రామం అంతా మిఠాయిలు పంచి తన సంతోషాన్ని పంచుకున్నాడు. ప్రస్తుతం తల్లి, బిడ్డ క్షేమంగా ఉన్నారు.