ఉత్తరప్రదేశ్ రాష్ట్రంలోని కుషీనగర్ జిల్లాలో, గర్భస్రావం (Abortion) చేయడానికి నిరాకరించిన 19 ఏళ్ల యువతిని ఆమె ప్రియుడే కదులుతున్న కారులో నుండి బయటకు తోసేసిన దిగ్భ్రాంతికరమైన ఘటన వెలుగులోకి వచ్చింది.
ఘటన వివరాలు: కోల్‌కతాకు చెందిన సదరు యువతి, రెండేళ్ల క్రితం ఒక కళా బృందంలో పని చేస్తున్నప్పుడు అమ్జద్ అలీ అనే వ్యక్తితో ప్రేమలో పడింది. పెళ్లి చేసుకుంటానని నమ్మబలికి ఆమెతో సాన్నిహిత్యం పెంచుకున్నాడు. ఈ క్రమంలో ఆ యువతి ఇప్పుడు రెండు నెలల గర్భిణిగా ఉంది.
దీంతో ఆగ్రహం వ్యక్తం చేసిన అమ్జద్, ఆమెను పెళ్లి చేసుకోవడానికి నిరాకరించడమే కాకుండా గర్భం తీసేయమని నిరంతరం వేధించసాగాడు. గత గురువారం సాయంత్రం, అమ్జద్ అలీ తన స్నేహితుడు సద్దాంతో కలిసి ఆ యువతిని గర్భస్రావం చేయించేందుకు కారులో తీసుకెళ్లాడు.
ఆ సమయంలో వారి మధ్య జరిగిన వాగ్వాదంలో, ఆ యువతి గర్భస్రావానికి ఖచ్చితంగా నిరాకరించింది. దీంతో మధురియా ఇంటర్ కాలేజీ సమీపంలో కదులుతున్న కారులో నుండి ఆమెను బయటకు తోసేసి వారిద్దరూ పరారయ్యారు.
గాయపడిన యువతి ప్రస్తుతం ఆసుపత్రిలో చికిత్స పొందుతోంది. దీనిపై కేసు నమోదు చేసిన దురక్‌పట్టి పోలీసులు, అమ్జద్ అలీ మరియు అతని స్నేహితుడిని అదుపులోకి తీసుకుని విచారణ జరుపుతున్నారు.