పెళ్లి ఇల్లంటే ఇంక చెప్పేదేముంది? గుమ్మాల నిండా తోరణాలు కట్టి, బంధుమిత్రుల కోలాహలంతో ఆ ప్రాంగణమంతా కళకళలాడిపోయింది.
వరుడు ఊరేగింపుగా తరలిరావడంతో ఆ ఇంట ఆనందోత్సాహాలు వెల్లువెత్తాయి. అయితే ఆ సంతోషం ఎంతోసేపు నిలవలేదు. అకస్మాత్తుగా బూట్ల చప్పుడుతో కల్యాణ మండపంలోకి ప్రవేశించిన పోలీసులు.. మొత్తం పెళ్లి వేదికను ఒక్కసారిగా దిగ్భ్రాంతికి గురిచేశారు. పశ్చిమ బెంగాల్‌లోని ముర్షిదాబాద్ జిల్లా పరిధిలోని బెనియాగ్రామ్ గ్రామంలో గత సెప్టెంబర్ 10వ తేదీన ఈ ఘటన చోటుచేసుకుంది.
ఆ గ్రామానికి చెందిన ఓ యువకుడికి, మైనర్ బాలికకు పెద్దలు వివాహం నిశ్చయించారు. నిర్ణయించిన ముహూర్తానికే పెళ్లి రోజూ రానే వచ్చింది. ఊరంతా గుమిగూడగా, బాణసంచా మోతలతో పెళ్లికొడుకు అత్యంత ఉత్సాహంగా కల్యాణ మండపానికి చేరుకున్నాడు. బంధువులు, స్నేహితులు ఆనందంలో మునిగితేలుతున్న సరిగ్గా అదే సమయంలో పోలీసులకు రహస్య సమాచారం అందింది.
తక్షణమే పెళ్లి మండపంలోకి అడుగుపెట్టిన పోలీసులు బాలిక వయస్సును ధ్రువీకరించుకున్నారు. ఆ సమయంలో, చట్టబద్ధమైన వివాహ వయస్సు ఇంకా రాని మైనర్ బాలికకు పెళ్లి చేస్తున్నట్లు నిర్ధారణ అయింది. దీంతో వెంటనే వివాహాన్ని అడ్డుకున్న పోలీసులు.. పెళ్లిపీటలపై ఉన్న వరుడిని అదుపులోకి తీసుకుని పోలీస్ స్టేషన్‌కు తరలించారు. పోలీసుల ఈ సత్వర స్పందనపై స్థానికుల నుంచి పెద్ద ఎత్తున ప్రశంసలు వెల్లువెత్తాయి.
ముర్షిదాబాద్ ప్రాంతంలో బాల్య వివాహాలకు వ్యతిరేకంగా పోలీసులు వరుసగా కఠిన చర్యలు తీసుకుంటున్నారు. గత సెప్టెంబర్ 9వ తేదీన కూడా 16 ఏళ్ల బాలికకు జరగాల్సిన బాల్య వివాహాన్ని పోలీసులు ఇదే తరహాలో అడ్డుకున్నారు. ఆ ఘటనలో పెళ్లి జరిపించేందుకు యత్నించిన ఖాజీతో పాటు బాలిక తండ్రిని అరెస్ట్ చేసి కేసులు నమోదు చేశారు.
సెప్టెంబర్ 10న వివాహం ఆగిపోయిన బాలిక భవిష్యత్తు, రక్షణను దృష్టిలో ఉంచుకుని.. ఆమెను వెంటనే రక్షించి బాలల సంక్షేమ కమిటీ (CWC) సంరక్షణకు అప్పగించారు. ముర్షిదాబాద్ పోలీసుల సత్వర చర్యలను పలువురు ప్రశంసించారు.
బాలికల భద్రత, విద్యా హక్కుల పరిరక్షణలో రాజీపడే ప్రసక్తే లేదని, బాల్య వివాహాలను పూర్తిగా నిర్మూలించేందుకు చట్టపరమైన చర్యలు, సామాజిక చైతన్యం ద్వారా పిల్లల భవిష్యత్తును కాపాడతామని ఉన్నతాధికారులు స్పష్టం చేశారు. చట్టం తన పని తాను చేసినప్పటికీ.. కళ్లెదుటే ఓ బాలిక బాల్యం నాశనం కాకుండా కాపాడిన ఈ ఘటన స్థానికంగా తీవ్ర చర్చనీయాంశంగా మారడంతో పాటు ప్రజల్లో ఒక గొప్ప ఉపశమనాన్ని నింపింది.