విమానంలో కేరళకు చేరుకుని రాష్ట్రవ్యాప్తంగా భారీ ఎత్తున దొంగతనాలకు పథకం పన్నిన ఉత్తరప్రదేశ్‌కు చెందిన 11 మంది సభ్యుల ముఠాను కేరళ పోలీసులు చాకచక్యంగా అరెస్టు చేశారు.
మీరట్ నగరానికి చెందిన ఈ దొంగలు ఎర్నాకుళం, త్రిస్సూర్ మరియు కన్నూర్ జిల్లాల్లో పట్టుబడ్డారు.
ఈ దొంగతనాలకు పాల్పడేందుకు వారు ఉపయోగించాల్సిన మోటార్ సైకిళ్లను ముందుగానే రైలులో కేరళకు పంపించారు. కొచ్చి విమానాశ్రయంలో విమానం దిగిన ఈ ముఠా సభ్యులు, తలో బైక్ తీసుకుని వేర్వేరు జిల్లాలకు విడిపోయి దొంగతనాలు చేయాలని ప్లాన్ చేశారు.
అయితే, ఇటీవల త్రిస్సూర్‌లో రిహాన్ అనే వ్యక్తిని పోలీసులు అరెస్టు చేసి విచారించగా, యూపీకి చెందిన ఓ పెద్ద దొంగల ముఠా కేరళలోకి ప్రవేశించిందనే షాకింగ్ విషయం వెలుగులోకి వచ్చింది.
దీంతో అప్రమత్తమైన పోలీసులు ఎర్నాకుళం, కన్నూర్ జిల్లాల పోలీసులను అలెర్ట్ చేశారు. ఆ సమాచారం ఆధారంగా కలమస్సేరిలోని ఓ లాడ్జిలో బస చేసిన ఐదుగురిని, కన్నూర్‌లో తలదాచుకున్న మరో ఐదుగురిని పోలీసులు వరుసగా అరెస్టు చేశారు. వారి వద్ద నుంచి కేబుళ్లను కత్తిరించే పరికరాలు, తాళం చెవులు, సెల్‌ఫోన్లను స్వాధీనం చేసుకున్నారు.
తాళం వేసి ఉన్న ఇళ్లు, టెలిఫోన్ ఎక్స్ఛేంజీల్లో ఉండే రాగి తీగలను (కాపర్ వైర్లను) దొంగిలించి విక్రయించడమే వీరి ప్రధాన లక్ష్యంగా తెలుస్తోంది. అయితే, ఫ్లైట్‌లో వచ్చి దిగేంత పెద్ద ముఠాగా వ్యవహరించారు కాబట్టి వీరికి మరేవైనా భారీ ప్లాన్లు ఉన్నాయా, అలాగే ఇతర రాష్ట్రాల్లో వీరు చేసిన నేరాలేమిటి అనే కోణంలో పోలీసులు ముమ్మర దర్యాప్తు చేస్తున్నారు.