“ప్రమాదంలో టికెట్ పోతే పరిహారం ఇవ్వరా ఏంటి?!” – రైల్వే శాఖకు చెంపపెట్టులాంటి సుప్రీంకోర్టు చారిత్రాత్మక తీర్పు!

రైలు ప్రయాణంలో జరిగే ప్రమాదాల్లో ప్రయాణికుడి వద్ద టికెట్ లేదనే ఒక్క కారణంతో బాధితుడి కుటుంబానికి పరిహారం నిరాకరించకూడదని సుప్రీంకోర్టు అత్యంత కీలక తీర్పునిచ్చింది.

సాధారణంగా రైలు నుండి ప్రమాదవశాత్తు జారిపడి లేదా ఊహించని ప్రమాదంలో చిక్కుకుని ఒక వ్యక్తి మరణించినప్పుడు, అతని ప్రయాణ టికెట్ వెంటనే దొరక్కపోవడం సహజం. ప్రమాద తీవ్రతలో లేదా బాధితుడిని ఆసుపత్రిలో చేర్చి చికిత్స అందిస్తున్న గందరగోళ పరిస్థితుల్లో, ఆ టికెట్‌ను భద్రంగా దాచి ఉంచడం అసాధ్యమైన పని.

ఇలాంటి పరిస్థితుల్లో కేవలం చేతిలో టికెట్ లేదన్న కారణంతో అతను అక్రమంగా ప్రయాణించాడని ముద్ర వేసి, పరిహారాన్ని తిరస్కరించడం న్యాయం కాదని న్యాయస్థానం చాలా స్పష్టంగా పేర్కొంది.

అహ్మదాబాద్ సమీపంలో రైలు నుండి ప్రమాదవశాత్తు జారిపడి తీవ్రంగా గాయపడి, ఆ తర్వాత చికిత్స పొందుతూ మృతి చెందిన మహేష్‌భాయ్ అనే వ్యక్తి కేసును ప్రస్తావిస్తూ సుప్రీంకోర్టు ఈ ఆదేశాలు జారీ చేసింది. ఈ ఘటనలో బాధితుడి తల్లిదండ్రులకు ₹8 లక్షల పరిహారం చెల్లించాలని రైల్వే క్లెయిమ్స్ ట్రిబ్యునల్ ఆదేశించగా, ప్రయాణ టికెట్ లేదనే కారణంతో గుజరాత్ హైకోర్టు ఆ తీర్పును రద్దు చేసింది.

దీనిని సవాలు చేస్తూ దాఖలైన అప్పీల్‌ను విచారించిన సుప్రీంకోర్టు న్యాయమూర్తులు జస్టిస్ ఉజ్జల్ భుయాన్, జస్టిస్ అతుల్ ఎస్. చందుర్కర్‌లతో కూడిన ధర్మాసనం.. హైకోర్టు ఉత్తర్వులను కొట్టివేస్తూ, రైల్వే ట్రిబ్యునల్ ఇచ్చిన పరిహారపు ఆదేశాలను తిరిగి సమర్థించింది.

బాధితుడి వద్ద సరైన ప్రయాణ టికెట్ ఉందని అతని తల్లిదండ్రులు అఫిడవిట్ దాఖలు చేస్తేనే ప్రాథమిక బాధ్యత పూర్తవుతుందని, అందుకు విరుద్ధంగా అతను టికెట్ లేకుండానే ప్రయాణించాడని నిరూపించే బాధ్యత రైల్వే శాఖదేనని కోర్టు స్పష్టం చేసింది.

అంతేకాకుండా, ప్రమాదం జరిగిన కొన్ని నెలల తర్వాత రైల్వే శాఖ దాఖలు చేసిన ఆలస్యపు విచారణ నివేదిక వంటి సాంకేతిక కారణాలను చూపి నిరుపేద ప్రజల న్యాయమైన హక్కులను కాలరాయకూడదని న్యాయమూర్తులు కఠినంగా వ్యాఖ్యానించారు.

ప్రభుత్వంలో ఒక భాగమైన రైల్వే శాఖ, ఇలాంటి విపత్కర పరిస్థితుల్లో బాధిత కుటుంబాలకు అండగా నిలిచేలా విశాల దృక్పథంతో వ్యవహరించాలే తప్ప, చిన్నపాటి లోపాలను చూపి బాధ్యత నుండి తప్పుకోకూడదనేదే ఈ తీర్పు సారాంశం.

అలాగే బాధిత కుటుంబానికి తక్షణమే 30 రోజుల్లోగా పరిహారం అందజేయాలని కూడా ఆదేశించింది. రైలు ప్రమాదాల బారిన పడి సరైన పరిహారం అందక అల్లాడుతున్న వేలాది కుటుంబాలకు ఈ తీర్పు ఎంతో భరోసాను, చట్టపరమైన రక్షణను కల్పించింది.