ఉత్తరప్రదేశ్లోని ప్రయాగ్రాజ్లో ఒక ఘోరమైన ఘటన వెలుగులోకి వచ్చింది. కోత్వాలీ ప్రాంతంలోని సౌత్ మాలాకాలో ఉన్న ఒక ఇంట్లో ఒకే కుటుంబానికి చెందిన నలుగురు వ్యక్తుల మృతదేహాలను పోలీసులు స్వాధీనం చేసుకున్నారు.
స్థానికులు ఇంటి నుండి తీవ్రమైన దుర్వాసన వస్తోందని పోలీసులకు సమాచారం అందించారు. పోలీసులు అక్కడికి చేరుకుని ఇంటి తలుపులు బద్దలు కొట్టి లోపలికి వెళ్లగా, మూడు మృతదేహాలు కనిపించాయి. ఆ తర్వాత అదే ఇంటి గ్రౌండ్ ఫ్లోర్లో ఉన్న దుకాణంలో నాలుగవ మృతదేహాన్ని కూడా గుర్తించారు.
ఏం జరిగింది? ప్రాథమిక విచారణ ప్రకారం, ఈ మృతదేహాలు దాదాపు రెండు మూడు రోజుల క్రితానివి. మృతదేహాలపై గాయాలు ఉండటంతో ఇది హత్యగా పోలీసులు అనుమానిస్తున్నారు. ఈ ఘటనతో స్థానికులు ఉలిక్కిపడ్డారు. ప్రస్తుతం ఈ కుటుంబానికి చెందిన ఒక కుమారుడు అదృశ్యమయ్యాడని, పోలీసులు అతని కోసం గాలిస్తున్నారని సమాచారం.
మృతులను వీరేంద్ర వైశ్య (70), అతని భార్య అనిత (65), అవివాహిత కుమార్తె మీనాక్షి (45) మరియు కుమారుడు అభిషేక్ (40)గా గుర్తించారు. డీసీపీ (సిటీ) మనీష్ శాండిల్య మాట్లాడుతూ, ఫొరెన్సిక్ బృందాలతో గదిని క్షుణ్ణంగా తనిఖీ చేయిస్తున్నామని, మృతదేహాలను పోస్ట్మార్టం కోసం పంపామని తెలిపారు.
ఆస్తి వివాదాలే కారణమా? వీరేంద్ర వైశ్య కుటుంబానికి భారీగా ఆస్తులు ఉన్నాయి. ఆయన తన ఇంటి గ్రౌండ్ ఫ్లోర్లో మార్కెట్ను నిర్మించి, 14 దుకాణాలను ఏర్పాటు చేశారు. అందులో 12 దుకాణాలను అద్దెకు ఇవ్వగా, మిగిలిన రెండింటిని తన పిల్లలు నిర్వహిస్తున్నారు. ఆస్తి విషయంలో కుటుంబంలో గొడవలు ఉన్నట్లు తెలుస్తోంది. 15-20 ఏళ్ల క్రితమే ఒక కొడుకును ఆస్తి నుండి తొలగించగా, తండ్రితో కలిసి ఉంటున్న మరొక కుమారుడితో కూడా వివాదాలు ఉన్నట్లు సమాచారం.
ప్రస్తుతం పోలీసులు హత్య కోణంలో కేసు నమోదు చేసి దర్యాప్తు చేస్తున్నారు. పూర్తి విచారణ తర్వాతే నిందితులు ఎవరు, ఎందుకు ఈ దారుణానికి ఒడిగట్టారనేది స్పష్టమవుతుంది.