మొరీనా: ప్రేమ గుడ్డిదంటారు.. కానీ ఇక్కడ ఆ ప్రేమ కన్నవారి ప్రాణాలనే తీసేంత కసాయిగా మారింది. ప్రియుడితో కలిసి జీవించడానికి అడ్డుగా ఉన్నారని భావించిన ఓ మైనర్ బాలిక, సాక్షాత్తూ తన తల్లిదండ్రులనే అంతం చేయాలని చూసింది. చపాతీల్లో ఎలుకల మందు కలిపి వారికి వడ్డించిన ఈ షాకింగ్ ఘటన మధ్యప్రదేశ్లోని మొరీనా జిల్లాలో వెలుగుచూసింది.
అసలేం జరిగింది?
మొరీనా జిల్లాలోని పోర్సా ప్రాంతానికి చెందిన ఒక మైనర్ బాలిక, సుదామ అనే యువకుడితో ప్రేమలో ఉంది. వీరి ప్రేమను ఇంట్లో వారు నిరాకరించడంతో, ఎలాగైనా వారిని అడ్డు తొలగించుకోవాలని ఆ బాలిక నిర్ణయించుకుంది. పక్కా ప్లాన్ ప్రకారం, ఇంట్లో చపాతీలు చేసే సమయంలో అందులో ఎలుకల మందు కలిపి తల్లిదండ్రులకు పెట్టింది. అది తిన్న వారు అపస్మారక స్థితిలోకి వెళ్లడంతో వెంటనే గ్వాలియర్ ఆస్పత్రికి తరలించారు. ప్రస్తుతం వారి పరిస్థితి విషమంగా ఉన్నట్లు సమాచారం.
చిక్కించింది ఆ ఒక్క ఆడియో కాల్!
ఈ దారుణానికి సంబంధించిన కుట్ర అంతా ఆ బాలిక తన ప్రియుడితో జరిపిన ఫోన్ కాల్తో బయటపడింది. ప్రస్తుతం సోషల్ మీడియాలో వైరల్ అవుతున్న ఆ ఆడియో క్లిప్లో బాలికా ఇలా అంటోంది:
“పక్కనే ఎరువుల షాపు ఉంది, అక్కడి నుంచి ఎలుకల మందు తీసుకురావాలి. ఈరోజు నేను చపాతీలు చేస్తున్నాను, ఇదే సరైన సమయం. వాటిలో విషం కలిపి వారికి ఇచ్చేస్తాను.”
విచారణ వేగవంతం
వైరల్ అయిన ఆడియో క్లిప్ను కీలక ఆధారంగా సేకరించిన పోలీసులు, బాలికను మరియు ఆమె ప్రియుడు సుదామను అదుపులోకి తీసుకున్నారు. తల్లిదండ్రులను హత్య చేసేందుకు పథకం రచించినట్లు ప్రాథమిక విచారణలో తేలింది. ఈ ఘటన స్థానికంగా తీవ్ర కలకలం రేపింది. పోలీసులు కేసు నమోదు చేసి దర్యాప్తును ముమ్మరం చేశారు.