శీతాకాలంలో స్నానానికి నీటిని వేడి చేయడానికి చాలా మంది వాటర్ హీటర్ రాడ్లను (ఇమ్మర్షన్ రాడ్స్) ఉపయోగిస్తుంటారు. తక్కువ ఖర్చుతో నీటిని వేడి చేసుకునేందుకు ఉపయోగపడే ఈ పరికరాన్ని వాడేటప్పుడు భద్రతా నియమాలు పాటించడం అత్యంత ముఖ్యం.
రాడ్ బకెట్‌లో సరిగ్గా అమరకపోయినా లేదా అవసరమైన భద్రతా ఫీచర్లు లేకపోయినా విద్యుత్ షాక్ తగిలే తీవ్ర ప్రమాదం పొంచి ఉంటుంది.
1500 వాట్ల సామర్థ్యం కలిగిన హావెల్స్ జెల్లా (Havells Zella) హీటర్ రాడ్‌లో రాగి ట్యూబ్ (Copper Tube), నికెల్ ప్లేటింగ్, షాక్ ప్రూఫ్ డిజైన్, టచ్ ప్రొటెక్షన్ కవర్, హీటింగ్ ఇండికేటర్, ఆటో కట్-ఆఫ్ వంటి అధునాతన ఫీచర్లు ఉన్నాయి. బకెట్ అంచుకు రాడ్ గట్టిగా నిలిచేందుకు ప్రత్యేక హుక్ కూడా ఉంటుంది. అయినప్పటికీ, ఈ ఫీచర్లు ఉన్నంత మాత్రాన ప్లాస్టిక్ బకెట్ కరిగిపోదని లేదా విద్యుత్ ప్రమాదాలు జరగవని గుడ్డిగా నమ్మలేమని నిపుణులు హెచ్చరిస్తున్నారు.
హీటర్ రాడ్‌ను ఉపయోగించే ముందు బకెట్‌లో తగినంత నీటిని నింపి, రాడ్‌లోని వేడి చేసే భాగం నీటిలో పూర్తిగా మునిగేలా చూసుకోవాలి. అలాగే ఆ రాడ్ బకెట్ అడుగుభాగానికి గానీ, పక్క భాగాలకు గానీ నేరుగా తాకకుండా జాగ్రత్త వహించాలి. ఎలక్ట్రిక్ వైర్, ప్లగ్ మరియు హ్యాండిల్ భాగాలకు నీళ్లు తగలకుండా దూరంగా ఉంచాలి. హీటర్ ఆన్‌లో ఉన్న సమయంలో దానిని అలాగే వదిలేసి వేరే పనులకు వెళ్లకూడదు.
నీరు వేడెక్కిన తర్వాత ముందుగా స్విచ్ఛాఫ్ చేసి, ప్లగ్ తొలగించిన తర్వాతే రాడ్‌ను బయటకు తీయాలి. రాడ్ కరెంట్ కనెక్షన్‌లో ఉన్నప్పుడు ఎట్టి పరిస్థితుల్లోనూ నీటిలో చేయి పెట్టడం గానీ, రాడ్‌ను తాకడం గానీ చేయకూడదు. పాడైన లేదా డ్యామేజ్ అయిన వైర్లు, ప్లగ్‌లు ఉంటే వాటిని అస్సలు ఉపయోగించవద్దు. తయారీ సంస్థ అందించిన భద్రతా మార్గదర్శకాలను తూచా తప్పకుండా పాటిస్తూ, సరైన ఎలక్ట్రికల్ సాకెట్లను మాత్రమే వినియోగించడం అత్యంత అవసరం.
Leave a Reply