బెంగళూరు: ‘ఫారిన్ స్టైల్’లో ప్రపోజ్ చేస్తానని నమ్మించి, ప్రియుడి కళ్లు, కాళ్లు కట్టేసి సజీవ దహనం చేసిన కేసులో నిందితురాలు ప్రేమను పోలీసులు ముమ్మరంగా విచారిస్తున్నారు. నేటితో ప్రేమ పోలీసు కస్టడీ ముగియనుండటంతో అధికారులు ఆమెను కోర్టులో హాజరుపరచనున్నారు.
అయితే, కస్టడీలో ఉన్న సమయంలో ఆమె ఇచ్చిన స్టేట్మెంట్లపై పోలీసులకు అనేక అనుమానాలు వ్యక్తమవుతున్నాయి. దీంతో ఈ కేసు మరింత ఉత్కంఠగా మారింది. బెంగళూరు శివార్లలోని బ్యాడరహళ్లి పోలీస్ స్టేషన్ పరిధిలో జరిగిన ఈ నిగూఢ హత్యోదంతం ఇప్పుడు అందరినీ ఉలిక్కిపడేలా చేసింది.
ప్రేమ వాంగ్మూలంతో పోలీసులకు పెరిగిన అనుమానం: మృతుడు కిరణ్ గురించి నిందితురాలు ప్రేమ ఇచ్చిన సమాచారం పొంతన లేకుండా ఉంది. కిరణ్ చనిపోయిన తర్వాత తాను కూడా ఆత్మహత్య చేసుకోవడానికి ప్రయత్నించానని ఆమె చెప్పుకొచ్చింది. కానీ ఆమె నడవడిక, సంఘటనా స్థలంలో పరిస్థితులు చూస్తుంటే అది అబద్ధమని పోలీసులు అనుమానిస్తున్నారు. “నేను కూడా చావాలని అనుకున్నాను” అని చెబుతున్నప్పటికీ, ఆమె సృష్టించిన సీన్ అంతా పక్కా ప్లాన్ ప్రకారం జరిగినట్లు కనిపిస్తోంది.
ఆత్మహత్య కథను నమ్మని పోలీసులు: ఈ హత్యను ఆమె ముందుగానే ప్లాన్ చేసి ఉండవచ్చని, ఎవరికీ అనుమానం రాకుండా అన్ని ఏర్పాట్లు చేసుకుందని పోలీసులు భావిస్తున్నారు. సంఘటనా స్థలంలో విషపు సీసాలు, మాత్రలు టేబుల్పై సిద్ధంగా ఉండటం చూస్తుంటే, ‘ఆకస్మికంగా ఆత్మహత్యకు ప్రయత్నించాను’ అన్న ఆమె మాటలు నమ్మశక్యంగా లేవని దర్యాప్తు అధికారులు చెబుతున్నారు.
పోలీసుల మదిలో మరికొన్ని ప్రశ్నలు: కిరణ్కు నిప్పంటించిన వెంటనే ప్రేమ నేరుగా వాష్రూమ్కు వెళ్లి లోపల గడియ పెట్టుకుంది. నిప్పుల సెగతో కిరణ్ విలవిల్లాడుతూ ప్రాణాలు వదులుతున్న సమయంలో ఆమె వాష్రూమ్లోనే ఉంది. ఆ తర్వాత కాసేపటికే బయటకు వచ్చి ప్రశాంతంగా మెయిన్ డోర్ తీసి బయటకు రావడం పోలీసులను విస్మయానికి గురిచేస్తోంది. నిజంగా ఆత్మహత్య చేసుకోవాలనుకునే వ్యక్తి ఇంత ప్రశాంతంగా తలుపు తీసి బయటకు వస్తారా? అన్నదే ఇప్పుడు అధికారుల ముందున్న ప్రధాన ప్రశ్న.
నేటితో ముగియనున్న కస్టడీ: నేటితో ప్రేమ పోలీసు కస్టడీ ముగుస్తుండటంతో ఆమెను న్యాయస్థానంలో ప్రవేశపెట్టనున్నారు. విచారణలో ఆమె మాటల మధ్య ఉన్న వైరుధ్యాలను పోలీసులు క్షుణ్ణంగా పరిశీలిస్తున్నారు. ‘ఫారిన్ స్టైల్ సర్ప్రైజ్’ పేరుతో కిరణ్ను అక్కడికి పిలిపించి, పక్కా పథకం ప్రకారమే ఈ దారుణానికి ఒడిగట్టినట్లు ప్రాథమిక ఆధారాలు లభించాయి. ఇప్పటికే ఘటనా స్థలంలో ఆధారాల సేకరణ (మహజర్) పూర్తి చేసిన పోలీసులు, కిరణ్ కుటుంబ సభ్యుల వాంగ్మూలాలను కూడా నమోదు చేశారు.
ప్రేమ పేరుతో జరిగిన ఈ ఘాతుకం ఇప్పుడు ప్రజలను భయభ్రాంతులకు గురిచేస్తోంది. ‘ప్రపోజ్’ అనే మాట వింటేనే వణికిపోయేలా చేసిన ఈ కేసులో ప్రేమ అసలు ముఖచిత్రం త్వరలోనే విచారణలో పూర్తిగా వెల్లడి కానుంది.