“ఫెయిల్ చేస్తా.. నా దగ్గర వీడియో ఉంది!”.. బెదిరించి లైంగిక దాడికి పాల్పడ్డ కిరాతక టీచర్.. నమ్మి ట్యూషన్‌కు పంపిన తల్లిదండ్రులు.. 3 నెలల గర్భవతిని చేసిన వైనం!

పుదుచ్చేరికి చెందిన పదో తరగతి విద్యార్థినిపై ఆమె సోషల్ సైన్స్ ఉపాధ్యాయుడు జార్జ్ లైంగిక దాడికి పాల్పడిన దారుణ ఘటన వెలుగులోకి వచ్చింది.

చదువులో వెనుకబడిన విద్యార్థినులకు ఉచితంగా ట్యూషన్ చెబుతానంటూ ఒక గదిని అద్దెకు తీసుకున్న ఆ ఉపాధ్యాయుడు, బాధితురాలిని మాత్రమే మిగతా వారికంటే ముందుగా రప్పించి అఘాయిత్యానికి ఒడిగట్టేవాడు. ఉపాధ్యాయుడి చేష్టలను ఆ విద్యార్థిని వ్యతిరేకించగా, ఇంటర్నల్ మార్కులు తగ్గించి పరీక్షల్లో ఫెయిల్ చేస్తానని, ఓ నకిలీ వీడియోను చూపిస్తూ స్కూల్ నుంచి తీసివేయిస్తానని తీవ్రంగా బెదిరింపులకు గురిచేసి నిరంతరం లైంగిక వేధింపులకు పాల్పడ్డాడు.

ఉపాధ్యాయుడి వరుస అకృత్యాల కారణంగా ఆ మైనర్ బాలిక 3 నెలల గర్భవతిగా మారింది. లైంగిక దాడి గురించైనా, గర్భం గురించైనా సరైన అవగాహన లేని ఆ అమాయక బాలిక అస్వస్థతకు గురికావడంతో తల్లిదండ్రులు ఆసుపత్రికి తీసుకెళ్లగా ఈ షాకింగ్ నిజం బయటపడింది. బాలిక ఇచ్చిన వాంగ్మూలం ఆధారంగా వైద్యులు పోలీసులకు ఫిర్యాదు చేశారు. దీంతో పోలీసులు పోక్సో (POCSO) చట్టం కింద కేసు నమోదు చేసి, కుటుంబంతో సహా పరారయ్యేందుకు యత్నించిన ఆ ఉపాధ్యాయుడిని అరెస్ట్ చేసి జైలుకు తరలించారు. కాలేజీ మరియు పాఠశాలలో చదువుతున్న ముగ్గురు కుమార్తెలకు తండ్రైన వ్యక్తే తన విద్యార్థినిపై ఇంతటి ఘోరానికి పాల్పడటం స్థానికంగా తీవ్ర దిగ్భ్రాంతిని, ఆగ్రహాన్ని రేకెత్తించింది.