డ్రై స్పాంజ్ ఫ్రిజ్ ట్రిక్: ప్రతి ఇంట్లో ఎదురయ్యే అతి పెద్ద సమస్య ఏమిటంటే.. ఫ్రిజ్లో ఉంచిన కూరగాయలు కూడా త్వరగా పాడైపోవడం. మీరు కూడా ఈ సమస్యతో విసిగిపోయారా? అయితే మీకోసం ఒక అద్భుతమైన ‘చీప్ అండ్ బెస్ట్’ కిచెన్ హ్యాక్ ఇక్కడ ఉంది.
ప్రస్తుతం ప్రతి ఇంట్లో ఫ్రిజ్ అనేది సర్వసాధారణం అయిపోయింది. వారానికి సరిపడా కూరగాయలు తెచ్చి ఫ్రిజ్లో పెడతాము. కానీ రెండు రోజులు గడవకముందే ఆకుకూరలు వాడిపోవడం, పచ్చిమిర్చి మెత్తబడటం లేదా టమోటాలు కుళ్ళిపోవడం చూస్తుంటాము. ఎంత ఖరీదైన ఫ్రిజ్ ఉన్నా ఈ సమస్య చాలామందిని వేధిస్తుంటుంది. దీనికి పరిష్కారంగా ఇప్పుడు వంటగదికి సంబంధించిన ఒక సరళమైన చిట్కా వైరల్ అవుతోంది. అదే ‘డ్రై స్పాంజ్ ట్రిక్’. వినడానికి వింతగా అనిపించినా, దీని వెనుక ఉన్న లాజిక్ వింటే మీరు కూడా వెంటనే ప్రయత్నిస్తారు.
అసలు విలన్ ‘తేమ’
ఫ్రిజ్ ఉష్ణోగ్రత తక్కువగా ఉంటే కూరగాయలు పాడవవు అని చాలామంది భావిస్తారు. కానీ అసలు విలన్ ‘తేమ’ (Moisture). రిఫ్రిజిరేటర్ లోపల, ముఖ్యంగా వెజిటబుల్ బాక్స్లో తేమ ఎక్కువగా పేరుకుపోతుంది. ఈ అధిక తేమ కారణంగా బ్యాక్టీరియా మరియు బూజు త్వరగా వృద్ధి చెంది ఆకుకూరలు వాడిపోయేలా లేదా జిగటగా మారేలా చేస్తాయి.
స్పాంజ్ ఎలా పనిచేస్తుంది?
గిన్నెలు కడగడానికి ఉపయోగించే సాధారణ స్పాంజ్కు నీటిని పీల్చుకునే అద్భుతమైన గుణం ఉంటుంది. దీనిని కూరగాయల డ్రాయర్లో ఉంచినప్పుడు అది చేసే పనులు ఇవే:
- తేమ నియంత్రణ: బాక్స్లో చేరే అదనపు తేమను స్పాంజ్ వెంటనే పీల్చుకుంటుంది. దీనివల్ల కూరగాయల చుట్టూ ఉన్న వాతావరణం పొడిగా ఉండి, అవి ఎక్కువ కాలం తాజాగా ఉంటాయి.
- దుర్వాసన దూరం: ఫ్రిజ్లో వచ్చే రకరకాల ఆహార పదార్థాల వాసనను కూడా ఈ స్పాంజ్ పీల్చుకుని దుర్వాసనను తగ్గిస్తుంది.
- క్లీనింగ్ సులభం: డ్రాయర్ అడుగున నీరు నిలవడం, మురికి పేరుకుపోవడం వంటి సమస్యలను ఇది నివారిస్తుంది. తద్వారా ఫ్రిజ్ శుభ్రం చేయడం సులభమవుతుంది.
ఈ చిట్కాను ఎలా పాటించాలి?
- ముందుగా ఒక కొత్త పొడి స్పాంజ్ (Dry Sponge) తీసుకోండి.
- దానిని కూరగాయల డ్రాయర్ మూలల్లో లేదా పక్కన ఉంచండి.
- ఒకవేళ ఫ్రిజ్లో తేమ మరీ ఎక్కువగా ఉంటే, రెండు స్పాంజ్లను కూడా వాడవచ్చు.
- స్పాంజ్ను నేరుగా కూరగాయల మీద పెట్టకూడదు, వాటి పక్కన మాత్రమే ఉంచాలి.
పాలకూర, కొత్తిమీర వంటి ఆకుకూరలతో పాటు స్ట్రాబెర్రీలు, దోసకాయలు, క్యారెట్లు, క్యాప్సికమ్ వంటి కూరగాయలను ఈ చిట్కా ద్వారా ఎక్కువ కాలం తాజాగా ఉంచవచ్చు. ఖరీదైన కంటైనర్లు లేదా స్పెషల్ బ్యాగులు కొనాల్సిన అవసరం లేకుండా కేవలం ఐదు రూపాయల స్పాంజ్తో ఈ సమస్యకు పరిష్కారం కనుగొనవచ్చు.