బెంగళూరులో మూడు రోజుల క్రితం చేసిన సాంబార్‌ను వడ్డించిన విషయంలో తలెత్తిన వివాదం కారణంగా, భర్త మందలించడంతో మనస్తాపానికి గురైన ఓ యువతి విషం తాగి ఆత్మహత్య చేసుకున్న ఘటన తీవ్ర కలకలం రేపింది.
అసలేం జరిగింది? బెంగళూరుకు చెందిన రంగస్వామికి, కావ్యా (27) అనే మహిళతో ఐదేళ్ల క్రితం వివాహమైంది. వీరికి 4 ఏళ్ల బాబు ఉన్నాడు. మూడు రోజుల క్రితం కావ్య ఇంట్లో సాంబార్ చేసింది. మిగిలిన ఆ సాంబార్‌ను ఫ్రిజ్‌లో పెట్టి, గత మూడు రోజులుగా భర్తకు, బిడ్డకు అదే వడ్డిస్తూ వస్తోంది.
మూడవ రోజు కూడా పాత సాంబారే వడ్డించడంతో రంగస్వామికి తీవ్ర కోపం వచ్చింది. “ఎందుకు మూడు రోజులుగా ఒకే సాంబార్ పెడుతున్నావు?” అని కావ్యను నిలదీశాడు. ఈ విషయంలో ఇద్దరి మధ్య తీవ్ర వాగ్వాదం జరిగింది. ఈ క్రమంలో రంగస్వామి ఆమెను దూషించడమే కాకుండా, కొట్టినట్లు సమాచారం.
విషాదాంతం: భర్త తనను అందరి ముందు తిట్టి, కొట్టడంతో తీవ్ర మనస్తాపానికి గురైన కావ్య, విరక్తితో విషం తాగింది. ప్రాణాపాయ స్థితిలో ఉన్న ఆమెను వెంటనే ఆసుపత్రికి తరలించినప్పటికీ, చికిత్స ఫలితం లేక ఆమె మరణించింది. సమాచారం అందుకున్న పోలీసులు కేసు నమోదు చేసి దర్యాప్తు చేస్తున్నారు. కేవలం సాంబార్ విషయంలో ఒక నిండు ప్రాణం బలికావడం ఆ ప్రాంతంలో విషాదాన్ని నింపింది.