షాంగై: చైనాలో ప్రజలు పెద్ద సంఖ్యలో బంగారాన్ని విక్రయించడం మొదలుపెట్టారు. బంగారం ధరలు గరిష్ట స్థాయిలో ఉన్నప్పుడే అమ్మేసి భారీ లాభాలు పొందాలని వారు భావిస్తున్నారు. ఇది ప్రపంచ మార్కెట్‌లో బంగారం ధరలపై తీవ్ర ప్రభావాన్ని చూపుతోంది.
షాంగై నగరంలోని ఒక ప్రధాన వాణిజ్య కేంద్రంలో ప్రస్తుతం ప్రజలు ఒక వింత యంత్రాన్ని చుట్టుముట్టారు. అది ఏటీఎం అనుకుంటే పొరపాటే; అది ఒక అత్యాధునిక ‘గోల్డ్ రీసైక్లింగ్ మెషిన్’. ఇందులో మీరు బంగారాన్ని ఇచ్చి వెంటనే నగదు పొందవచ్చు. దుకాణానికి వెళ్లి బేరమాడే పని లేకుండా, బరువుకు తగ్గట్టుగా డబ్బును సులభంగా పొందవచ్చు. ప్రపంచ మార్కెట్‌లో బంగారం ధర మునుపెన్నడూ లేని విధంగా కొత్త రికార్డులను తాకడంతో, చైనీయులు తమ పాత నగలను, వారసత్వంగా వచ్చిన బంగారాన్ని అమ్మి లాభాలు చూస్తున్నారు.
చైనాలో బంగారాన్ని కేవలం ఆభరణంగానే కాకుండా ఒక ముఖ్యమైన పొదుపుగా భావిస్తారు. అయితే ప్రస్తుతం ఒక ఔన్సు బంగారం ధర సుమారు $5,600 కు చేరడంతో, ప్రజలు కొనడం కంటే అమ్మడానికే మొగ్గు చూపుతున్నారు.
డిజిటల్ పద్ధతిలో బంగారం విక్రయం ‘కింగ్‌హుడ్ గ్రూప్’ (Kinghood Group) అనే సంస్థ ఏర్పాటు చేసిన ఈ యంత్రం ఒక రోబోలా పనిచేస్తుంది. దీని స్క్రీన్‌పై షాంగై గోల్డ్ మార్కెట్ ధరలు సెకను సెకనుకూ మారుతూ కనిపిస్తాయి. ప్రజలు తమ వద్ద ఉన్న ఉంగరాలు, నాణేలను అందులో వేయగానే, ఒక రోబోటిక్ చేయి వాటిని తీసుకుని బరువు వేస్తుంది. ఆ తర్వాత కాంతి తరంగాల (Light waves) సాయంతో బంగారం నాణ్యతను అత్యంత ఖచ్చితంగా పరీక్షిస్తుంది. ఈ ప్రక్రియ మొత్తాన్ని కస్టమర్లు లైవ్ వీడియోలో చూడవచ్చు.
10 రెట్ల లాభం దీని ద్వారా చాలా మంది 10 రెట్ల వరకు లాభం పొందుతున్నారు. ఈ భారీ విక్రయాల వల్ల అంతర్జాతీయ మార్కెట్‌లో బంగారం, వెండి ధరలు వరుసగా నాలుగో రోజు కూడా భారీగా పడిపోయాయి. గత 40 ఏళ్లలో లేనంత దారుణమైన పతనాన్ని ఇవి చూస్తున్నాయి. ముఖ్యంగా వెండి ధర ఒకే రోజులో 30 శాతం కంటే ఎక్కువ పడిపోవడం ఇన్వెస్టర్లను ఆందోళనకు గురిచేస్తోంది.
అంతర్జాతీయ మార్కెట్‌లో ఏం జరుగుతోంది? అమెరికా ఫెడరల్ రిజర్వ్ (US Fed) తదుపరి అధ్యక్షుడిగా కెవిన్ వార్ష్ (Kevin Warsh) పేరును అధ్యక్షుడు డొనాల్డ్ ట్రంప్ ప్రతిపాదించనున్నారనే వార్తలే ఈ ధరల పతనానికి ప్రధాన కారణం. ఆయన ద్రవ్యోల్బణ వ్యతిరేకి (Inflation Hawk) కావడంతో డాలర్ విలువ బలపడింది. ఫలితంగా బంగారం, వెండి ధరలు దిగజారాయి.
- బంగారం: న్యూయార్క్ మార్కెట్‌లో స్పాట్ గోల్డ్ ధర 13% తగ్గి, ఒక ఔన్సు 5,000 డాలర్ల కంటే కిందకు పడిపోయింది.
- వెండి: వెండి ధర ఏకంగా 36% తగ్గి చారిత్రక పతనాన్ని నమోదు చేసింది.