బంగ్లాదేశ్ పార్లమెంటరీ ఎన్నికలలో తారిఖ్ రెహ్మాన్ నేతృత్వంలోని బంగ్లాదేశ్ నేషనలిస్ట్ పార్టీ (BNP) భారీ మెజారిటీని సాధించింది. మొత్తం 299 సీట్లలో BNP 212 స్థానాలను గెలుచుకోగా, దాని మిత్రపక్షం జమాత్-ఎ-ఇస్లామీ 77 సీట్లను కైవసం చేసుకుంది.
ఎన్నికల్లో ఘనవిజయం సాధించిన వెంటనే, BNP భారత్ ముందు ఒక కీలక డిమాండ్‌ను ఉంచింది. ఇది ఇరు దేశాల మధ్య ఉద్రిక్తతలకు కారణమయ్యే అవకాశం ఉంది. తన రాజకీయ ప్రత్యర్థి, మాజీ ప్రధాని షేక్ హసీనాను భారత్ తమకు అప్పగించాలని (Extradition) BNP మరోసారి డిమాండ్ చేసింది. హసీనా బంగ్లాదేశ్‌లో విచారణను ఎదుర్కోవాలని ఆ పార్టీ స్పష్టం చేస్తోంది.
BNP వైఖరి: ఎన్నికల ఫలితాల అనంతరం BNP స్టాండింగ్ కమిటీ సభ్యుడు సలావుద్దీన్ అహ్మద్ మాట్లాడుతూ.. హసీనాను విచారణ నిమిత్తం బంగ్లాదేశ్‌కు పంపాలని అధికారికంగా భారత్‌ను కోరతామని తెలిపారు. చట్ట ప్రకారం ఆమె ఇక్కడ విచారణ ఎదుర్కోవాలని, ఈ విషయంలో భారత్ సహకరిస్తుందని ఆశిస్తున్నామని ఆయన పేర్కొన్నారు. “మేము భారత్‌తో సహా అన్ని దేశాలతో పరస్పర గౌరవంతో కూడిన స్నేహపూర్వక సంబంధాలను కోరుకుంటున్నాము” అని ఆయన వెల్లడించారు.
భారత్ స్పందన: మరోవైపు, భారత్‌లో ఆశ్రయం పొందుతున్న షేక్ హసీనా ఫిబ్రవరి 12న జరిగిన ఈ ఎన్నికలను “ప్రహసనం” అని అభివర్ణించారు. వీటిని రద్దు చేయాలని ఆమె డిమాండ్ చేశారు. హసీనా అప్పగింతపై భారత విదేశీ వ్యవహారాల మంత్రిత్వ శాఖ ప్రతినిధి రణధీర్ జైస్వాల్ గతంలోనే స్పందిస్తూ.. “మాకు అభ్యర్థన అందింది. ప్రస్తుతం ఉన్న చట్టపరమైన మరియు న్యాయపరమైన ప్రక్రియల ప్రకారం దీనిని పరిశీలిస్తున్నాము” అని తెలిపారు. బంగ్లాదేశ్‌లో శాంతి, ప్రజాస్వామ్యం మరియు స్థిరత్వం కోసం భారత్ కట్టుబడి ఉందని ఆయన స్పష్టం చేశారు.
నేపథ్యం: 2024లో విద్యార్థుల ఉద్యమం తర్వాత ఆగస్టు 5న షేక్ హసీనా ఢాకాను విడిచిపెట్టి భారత్‌కు వచ్చారు. అప్పటి నుండి ఆమె ఇక్కడే ఉంటున్నారు. 2025లో బంగ్లాదేశ్ ప్రత్యేక కోర్టు ఆమెను దోషిగా నిర్ధారించి, మరణశిక్ష కూడా విధించింది. ఇప్పుడు BNP అధికారంలోకి రావడంతో, హసీనా అప్పగింత అంశం భారత్-బంగ్లాదేశ్ సంబంధాలలో ఒక సంక్లిష్టమైన దౌత్య సమస్యగా మారనుంది.