బడికి నమ్మి పంపిస్తే ఇలా చేశారేంటి..! “కామ రాక్షసుడిగా మారిన ఉపాధ్యాయుడు”.. 14 ఏళ్ల బాలికకు గర్భస్రావం.. ప్రాణమే పోయిన ఘోరం!

జమ్మూ కాశ్మీర్‌లోని కిష్త్వార్ జిల్లాలో 14 ఏళ్ల బాలిక మృతి చెందిన ఘటన తీవ్ర దిగ్భ్రాంతిని కలిగించింది.

గర్భ సంబంధిత వైద్య చికిత్స కోసం బాలికను కిష్త్వార్ నుంచి దోడా జిల్లాకు తరలించినట్లు అధికారులు తెలిపారు. అయితే ఆస్పత్రికి వెళ్లే మార్గంలోనే బాలిక ఆరోగ్యం విషమించి మృతి చెందినట్లు సమాచారం.

ఆ బాలిక గర్భం దాల్చడానికి పాఠశాల ఉపాధ్యాయుడే కారణమని అనుమానిస్తూ పోలీసులు దర్యాప్తు చేస్తున్నారు. ఈ ఘటనపై కేసు నమోదు చేసుకుని, సదరు ఉపాధ్యాయుడిని అరెస్ట్ చేసినట్లు సమాచారం. చట్టపరమైన నిబంధనల ప్రకారం మరణించిన బాలిక వివరాలను పోలీసులు వెల్లడించలేదు.

బాలిక గర్భం దాల్చడానికి గల కారణాలు, ఉపాధ్యాయుడి ప్రమేయం మరియు ఆస్పత్రికి తీసుకెళ్లే సమయంలో నెలకొన్న పరిస్థితులపై పోలీసులు పలు కోణాల్లో దర్యాప్తు చేస్తున్నారు. విచారణలో ఆరోపణలు రుజువైతే, చట్టప్రకారం కఠిన చర్యలు తీసుకుంటామని అధికారులు స్పష్టం చేశారు.

ఇదిలా ఉండగా, సదరు ఉపాధ్యాయుడిని విధుల నుంచి సస్పెండ్ చేసినట్లు సమాచారం. ఈ ఘటన కిష్త్వార్ ప్రాంతంలో తీవ్ర కలకలం రేపగా, విద్యా సంస్థల్లో చిన్నారుల భద్రత, బాధ్యతలపై తీవ్ర ఆందోళనలు వ్యక్తమవుతున్నాయి. ఈ కేసుపై పోలీసులు దర్యాప్తు కొనసాగిస్తున్నారు.