బలూచిస్థాన్ స్వాతంత్ర్య సమరయోధులు ఏ ఆధునిక సాంకేతికత, ఆయుధాలు లేకుండానే కేవలం మట్టి, రాళ్లను ఉపయోగించి పాకిస్థాన్ సైన్యంపై అసాధారణ దాడులు చేసి ప్రపంచాన్ని ఆశ్చర్యపరిచారు.
మట్టి, రాళ్లే ఆయుధాలుగా..
యుద్ధం చేయడానికి ధైర్యం, ఆయుధాలు అవసరం. కానీ బలూచ్ పోరాట యోధులు తమ వద్ద సరైన ఆయుధాలు, సాంకేతికత లేకపోయినా శత్రువులను ఎలా ఎదుర్కోవాలో ప్రపంచానికి చూపించారు. వారు తమ ‘వార్ రూమ్’లో కంప్యూటర్లు, ప్రొజెక్టర్లు లేదా ఎల్ఈడీ స్క్రీన్లను ఉపయోగించడం లేదు. కేవలం తమ భూమిలోని మట్టిని, రాళ్లను ఉపయోగించి యుద్ధ తంత్రాలను రూపొందిస్తున్నారు.
వినూత్న యుద్ధ వ్యూహం:
రాళ్లను ఉపయోగించి దాడి చేయాల్సిన ప్రాంతాన్ని (Location Model) నమూనాగా తయారు చేసుకుంటారు. ఆ నమూనా ఆధారంగానే పాకిస్థాన్ సైనికులపై మెరుపు దాడులు చేస్తున్నారు.
ఇటీవల 72 గంటల్లోనే 42 మంది పాకిస్థాన్ సైనికులను హతమార్చడం ఈ వ్యూహం యొక్క విజయానికి నిదర్శనం.
గతంలో ‘జఫర్ ఎక్స్ప్రెస్’ రైలుపై దాడి చేసినప్పుడు కూడా, రైల్వే ట్రాక్ నమూనాను మట్టి, రాళ్లతో తయారు చేసి, ఏ ప్రాంతంలో పేలుడు జరపాలో పక్కాగా ప్లాన్ చేశారు. రైలు ఆ ప్రాంతానికి చేరుకోగానే దానిని పేల్చివేశారు.
“మాకు ఆధునిక ఆయుధాలు అక్కర్లేదు”
మా ప్లానింగ్ హైటెక్ కాకపోవచ్చు కానీ, 100 శాతం విజయవంతమని బలూచ్ పోరాట యోధులు చెబుతున్నారు. “ఈ మట్టిలో మా రక్తం ఉంది, అది పాకిస్థాన్ అకృత్యాల గాథను చెబుతోంది. పాకిస్థాన్ను అంతం చేయడానికి మాకు భారీ ఆయుధాలు అక్కర్లేదు, మా వద్ద ఉన్న రైఫిల్సే సరిపోతాయి” అని వారు పేర్కొంటున్నారు.
గతంలో ఒక బలూచ్ నాయకుడు మాట్లాడుతూ, “1971లో 93,000 మంది పాకిస్థాన్ సైనికులు భారత్ ముందు లొంగిపోయినప్పుడు వారు వదిలేసిన తుపాకులను, కనీసం ఒక్కో తుపాకీకి 10 బుల్లెట్లతో మాకు ఇవ్వండి.. పాకిస్థాన్ను మేమే అంతం చేస్తాం” అని సవాలు విసిరారు.
పాకిస్థాన్ సైన్యంపై బలూచ్ ఫైటర్ల ఈ పోరాటం ఇప్పుడు అంతర్జాతీయంగా చర్చనీయాంశంగా మారింది.