మరో యువకుడితో మాట్లాడుతోందన్న కోపంతో ఒక ప్రియుడు తన ప్రియురాలిని ఆఫీసులోనే అత్యంత దారుణంగా హత్య చేశాడు. మొదట ఆమె తల నరికి, ఆపై మృతదేహాన్ని బస్తాలో కుక్కడానికి వీలు పడకపోవడంతో కాళ్లు కూడా నరికేసిన ఉదంతం ఆగ్రాలో వెలుగులోకి వచ్చింది.
ఏం జరిగింది? ఆగ్రాలోని సంజయ్ ప్లేస్‌లో ఉన్న దివిషా టెక్నాలజీ లిమిటెడ్ కంపెనీలో 32 ఏళ్ల మిన్సీ శర్మ హెచ్ఆర్ మేనేజర్‌గా పనిచేస్తోంది. అదే ఆఫీసులో అకౌంటెంట్‌గా పనిచేసే వినయ్ రాజ్‌పుత్‌తో ఆమెకు రెండేళ్లుగా ప్రేమ వ్యవహారం ఉంది. అయితే, గత ఆరు నెలలుగా మిన్సీ మరో యువకుడితో చొరవగా ఉండటం వినయ్‌కు నచ్చలేదు.
హత్య జరిగిన తీరు: శనివారం సాయంత్రం ఆఫీసు ప్యూన్‌ను త్వరగా పంపేసిన వినయ్, మిన్సీని ఆఫీసుకు రప్పించాడు. అక్కడ వారి మధ్య గొడవ జరగడంతో, తనతో తెచ్చుకున్న కత్తితో ఆమె గొంతు కోసి చంపేశాడు. మృతదేహాన్ని మాయం చేసే క్రమంలో తలను వేరు చేసి స్కూటీ డిక్కీలో పెట్టాడు. మొండెం బస్తాలో పట్టకపోవడంతో కాళ్లను కూడా విరిచి లోపల కుక్కాడు.
దొరికిపోయిందిలా.. శనివారం అర్ధరాత్రి ఆమె స్కూటీపైనే మృతదేహాన్ని తీసుకుని వెళ్తుండగా, యమునా వంతెనపై స్కూటీ అదుపు తప్పి బస్తా కింద పడిపోయింది. పక్కనే వెళ్తున్న వారు గమనించడంతో భయపడిన వినయ్, మొండెం ఉన్న బస్తాను అక్కడే వదిలేసి పారిపోయాడు. తల, బట్టలు మరియు మొబైల్‌ను సమీపంలోని ఒక కాలువలో పడేశాడు. పోలీసులు సీసీటీవీ ఫుటేజ్ ఆధారంగా వినయ్‌ను అరెస్ట్ చేశారు.
కుటుంబంలో విషాదం: హత్యకు గురైన మిన్సీ తమ్ముడు దీపక్ శర్మ పెళ్లి ఫిబ్రవరి 6న జరగాల్సి ఉంది. ఆ పెళ్లి పనుల్లో వినయ్ కూడా సహాయం చేస్తూ ఉండటం గమనార్హం. పెళ్లి సందడి ఉండాల్సిన ఇంట్లో ఈ దారుణ హత్యతో విషాదం నెలకొంది.