పశ్చిమ బెంగాల్ ఎగ్జిట్ పోల్ ఫలితాలు 2026: పశ్చిమ బెంగాల్ అసెంబ్లీ ఎన్నికల ఎగ్జిట్ పోల్ ఫలితాలు రాష్ట్ర రాజకీయాల్లో ‘సునామీ’ని సృష్టించాయి. ప్రధానమైన 6 సర్వే సంస్థల్లో 5 సంస్థలు భారతీయ జనతా పార్టీ (BJP) పూర్తి మెజారిటీతో అధికారంలోకి వస్తుందని తేల్చిచెప్పాయి. ముస్లిం ఓట్లకు తామే రక్షకులమని చెప్పుకునే అసదుద్దీన్ ఓవైసీ, హుమాయూన్ కబీర్ వంటి నేతల ఎత్తుగడలు రివర్స్ అయ్యాయి. ఇది మమతా బెనర్జీ ఆశలపై నీళ్లు చల్లింది. రాష్ట్రంలో ప్రభుత్వం ఏర్పాటుకు కావాల్సిన 148 సీట్ల మ్యాజిక్ ఫిగర్ను బీజేపీ సునాయాసంగా దాటేస్తుందని అంచనాలు చెబుతున్నాయి.
బెంగాల్లో వికసించిన కమలం: ఓవైసీ, హుమాయూన్ ఆశలు అడియాశలు
పశ్చిమ బెంగాల్ అధికార సంగ్రామం చివరి దశకు చేరుకుంది. ఎగ్జిట్ పోల్స్ ద్వారా వెలువడిన ప్రాథమిక అంచనాలు విస్తుపోయేలా ఉన్నాయి. బెంగాల్లో ఈసారి ‘మార్పు’ కాదు, ఏకంగా ‘కాషాయ గాలి’ వీస్తోందని సర్వేలు స్పష్టం చేస్తున్నాయి. మూడోసారి అధికారాన్ని నిలబెట్టుకోవాలని శతవిధాల ప్రయత్నించిన మమతా బెనర్జీ, ఈ రేసులో వెనుకబడినట్లు కనిపిస్తున్నారు. ముఖ్యంగా ముస్లిం ఓట్ బ్యాంక్ నమ్ముకుని ‘కింగ్ మేకర్’ కావాలనుకున్న నేతలకు పెద్ద దెబ్బ తగిలింది. అసదుద్దీన్ ఓవైసీ, హుమాయూన్ కబీర్ వంటి నేతల రాజకీయ చదరంగం పూర్తిగా చెల్లాచెదురైంది. ముస్లిం ప్రాబల్యం ఉన్న ప్రాంతాల్లో జరిగిన ధ్రువీకరణ (Polarization) మరియు ప్రభుత్వ వ్యతిరేకత టీఎంసీ కోటను బద్దలు కొట్టాయి. అవినీతి, బుజ్జగింపు రాజకీయాల కంటే బీజేపీ ‘సోనార్ బంగ్లా’ నినాదానికే ప్రజలు మొగ్గు చూపినట్లు కనిపిస్తోంది.
బీజేపీ చారిత్రక విజయం దిశగా..
ప్రముఖ సర్వే సంస్థల గణాంకాలను పరిశీలిస్తే బీజేపీ బెంగాల్లో చారిత్రక విజయం సాధించేలా ఉంది:
ప్రజా పోల్: బీజేపీకి ఏకంగా 178 నుండి 208 సీట్లు వస్తాయని అంచనా వేసింది.
పి మార్క్ & చాణక్య స్ట్రాటజీ: ఈ సంస్థలు బీజేపీకి 150 కంటే ఎక్కువ సీట్లు ఇచ్చి పూర్తి మెజారిటీని ఖాయం చేశాయి.
దీనిబట్టి గ్రామీణ మరియు పట్టణ ప్రాంతాల్లో మమతా బెనర్జీ ఓట్ బ్యాంక్ను బీజేపీ భారీగా కొల్లగొట్టిందని స్పష్టమవుతోంది.
ధ్వంసమైన మమతా కోట
ఈ ఎన్నికల్లో మమతా బెనర్జీ మేజిక్ పనిచేసినట్లు కనిపించడం లేదు.
పోల్ డైరీ: టీఎంసీ కేవలం 99 నుండి 127 సీట్లకే పరిమితమవుతుందని పేర్కొంది.
కేవలం ‘పీపుల్స్ పల్స్’ మాత్రమే టీఎంసీకి 177-187 సీట్లు ఇచ్చి కాస్త ఊరటనిచ్చింది. మిగిలిన 5 సర్వేలు మాత్రం దీదీ ఓటమిని ఖరారు చేశాయి. కోల్కతా నుండి జిల్లాల వరకు టీఎంసీ కార్యకర్తల్లో నైరాశ్యం అప్పుడే మొదలైంది.
తప్పిన ముస్లిం ఓట్ల లెక్క
ఈ ఎన్నికల్లో హుమాయూన్ కబీర్, ఓవైసీలు చేసిన పెద్ద పెద్ద ప్రకటనలు ఉత్తవే అని తేలిపోయాయి. ముస్లిం ఓట్లు చీలిపోవడం టీఎంసీకి లాభం కలిగించాల్సింది పోయి, భారీ నష్టాన్ని చేకూర్చింది. హుమాయూన్ కబీర్ స్టింగ్ వీడియో ప్రభావం, ఓవైసీ ప్రభావం లేకపోవడంతో ప్రజలు వారిని తిరస్కరించారు. దీనికి తోడు బీజేపీకి అనుకూలంగా జరిగిన కౌంటర్ పోలరైజేషన్ ఈ ‘మెస్సీయ’లను అట్టడుగుకు నెట్టేసింది.