ఉత్తరప్రదేశ్లోని ప్రయాగ్రాజ్లో రాపిడో (Rapido) బైక్ టాక్సీలో ప్రయాణించిన 17 ఏళ్ల మైనర్ బాలుడిపై రైడర్ లైంగిక వేధింపులకు పాల్పడిన ఘటన నెట్టింట తీవ్ర కలకలం రేపింది.
బైక్ ప్రయాణంలో ఉండగానే వెనుక కూర్చున్న బాలుడితో ఆ డ్రైవర్ అసభ్యంగా ప్రవర్తిస్తూ చేతులు వేయడానికి ప్రయత్నించిన దృశ్యాలు బాలుడి మొబైల్ కెమెరాలో స్పష్టంగా రికార్డయ్యాయి. తనకు ఎదురైన ఈ చేదు అనుభవాన్ని ఏమాత్రం భయపడకుండా వీడియో తీసి సోషల్ మీడియాలో పోస్ట్ చేయడంతో అది క్షణాల్లో వైరల్గా మారి తీవ్ర ఆగ్రహావేశాలకు దారితీసింది.
ఈ ఘటనపై బాధితుడు ఆన్లైన్లో ఫిర్యాదు చేయడంతో రాపిడో యాజమాన్యం తక్షణమే స్పందించింది. కస్టమర్ల భద్రత విషయంలో ఇలాంటి అసభ్య ప్రవర్తనను ఎట్టి పరిస్థితుల్లోనూ సహించబోమని, సదరు డ్రైవర్ ఐడీని తమ ప్లాట్ఫామ్ నుంచి శాశ్వతంగా తొలగించినట్లు సంస్థ అధికారికంగా ప్రకటించింది.
అయితే ఆ కేటుగాడిపై పోలీసులు కఠిన చట్టపరమైన చర్యలు తీసుకోవాలని ఆ బాలుడు ఆవేదన వ్యక్తం చేశాడు. యాప్ ఆధారిత ప్రయాణ సేవలలో ప్రయాణికుల భద్రత ఎంతటి ప్రమాదంలో పడిందో ఈ ఘటన మరోసారి బట్టబయలు చేసింది.
లైంగిక వేధింపులు లింగభేదం లేకుండా మగపిల్లలకు కూడా ఎదురవుతున్నాయనే దారుణమైన వాస్తవాన్ని ఈ ఘటన నిరూపించింది. ఇలాంటి బైక్ టాక్సీ సంస్థలు కేవలం డ్రైవర్లను చేర్చుకోవడమే కాకుండా, వారి నేర చరిత్రను క్షుణ్ణంగా పరిశీలించిన (Background Check) తర్వాతే విధుల్లోకి తీసుకోవాలని, ప్రయాణికుల రక్షణకు పటిష్టమైన చర్యలు చేపట్టాలని నెటిజన్లు డిమాండ్ చేస్తున్నారు.