బ్రేకింగ్: నన్ను అంబిక మోసం చేసింది. రూ. 46 కోట్ల చెక్ మోసం. నటి రాధ ఫిర్యాదుతో కోలీవుడ్‌లో కలకలం..!!

సినీ పరిశ్రమలో ఒకప్పుడు అగ్ర కథానాయికలుగా, కోలీవుడ్ స్టార్ సిస్టర్స్‌గా ఓ వెలుగు వెలిగిన వారు నటీమణులు రాధ, అంబిక.

వీరి మధ్య ఉన్న కుటుంబ అనుబంధం, సినీ ప్రయాణం గురించి అందరికీ తెలిసిందే. అయితే, తాజాగా వీరి మధ్య చెలరేగిన కోట్ల రూపాయల ఆర్థిక మోసం వ్యవహారం సినీ వర్గాల్లో తీవ్ర దిగ్భ్రాంతిని కలిగిస్తోంది.

గతంలో నటి రాధ, నటి అంబిక ఇద్దరూ ఒకే ఇంట్లో కలిసి నివసించేవారు. ఆ సమయంలో వారి మధ్య ఉన్న సాన్నిహిత్యాన్ని ఆసరాగా చేసుకుని, అంబిక ఆమె సోదరుడితో కలిసి రాధ పేరు మీద ఉన్న 5 బ్యాంకు చెక్కులను దుర్వినియోగం చేసి మోసానికి పాల్పడినట్లు ఆరోపణలు వస్తున్నాయి.

ఈ వ్యవహారంలో తీవ్రంగా నష్టపోయినట్లు చెబుతున్న నటి రాధ.. వేరే దారి లేక నేరుగా చెన్నై పోలీస్ కమిషనర్ కార్యాలయానికి వెళ్లి అధికారికంగా ఫిర్యాదు చేశారు. దాదాపు రూ.46 కోట్ల మేర ఈ చెక్ మోసం జరిగినట్లు తెలియడంతో ప్రస్తుతం ఇది తీవ్ర కలకలం రేపుతోంది.

సినీ పరిశ్రమకు చెందిన ప్రముఖ సోదరీమణుల మధ్య ఉన్న ఆస్తి వివాదాలు ఇప్పుడు ఏకంగా పోలీస్ కమిషనర్ కార్యాలయానికి చేరాయి. ఒకే కుటుంబానికి చెందిన వారిపై, అందులోనూ సొంత అక్కపైనే కోట్లాది రూపాయల ఆర్థిక మోసం ఫిర్యాదు దాఖలు కావడం సినీ వర్గాల్లోనూ, అభిమానుల్లోనూ తీవ్ర ఆవేదనను, చర్చను రేకెత్తిస్తోంది. ఈ వ్యవహారంపై పోలీసులు దర్యాప్తును ముమ్మరం చేశారు.