బుధవారం హైదరాబాద్ నుండి థాయ్‌లాండ్‌లోని ఫుకెట్‌కు వెళ్తున్న ఎయిర్ ఇండియా ఎక్స్‌ప్రెస్ విమానం ఫుకెట్ విమానాశ్రయంలో ప్రమాదకరంగా ల్యాండ్ (Hard Landing) అయ్యింది. ఈ ఘటనలో విమానం ముందు భాగం (Nose) మరియు ల్యాండింగ్ గేర్ తీవ్రంగా దెబ్బతిన్నాయి.
నిజానికి ఈ విమానం ఉదయం 11:40 గంటలకు ల్యాండ్ కావాల్సి ఉండగా, షెడ్యూల్ కంటే ముందే 11:24 గంటలకు ల్యాండ్ అయ్యింది. రన్‌వేపై విమానం నిలిచిపోవడంతో, దానిని తొలగించేందుకు ఫుకెట్ ఎయిర్‌పోర్ట్ అధికారులు రన్‌వేను తాత్కాలికంగా మూసివేశారు.
ఘటన వివరాలు:
విమానం: ఎయిర్ ఇండియా ఎక్స్‌ప్రెస్ AXB938 (బోయింగ్ 737-800).
ప్రయాణికులు: 131 మంది ప్రయాణికులు, ఇద్దరు చిన్నారులు మరియు ఏడుగురు సిబ్బంది ఉన్నారు.
విమానం ల్యాండ్ అయ్యే సమయంలో సాంకేతిక లోపం తలెత్తడంతో రన్‌వేను మార్చి 11, 2026 మధ్యాహ్నం 12:08 నుండి సాయంత్రం 6:00 గంటల వరకు మూసివేస్తున్నట్లు అధికారులు ప్రకటించారు.
ఫుకెట్ అంతర్జాతీయ విమానాశ్రయ అధికారులు స్పందిస్తూ.. విమానంలో ఉన్న వారెవరికీ గాయాలు కాలేదని, అందరూ సురక్షితంగా ఉన్నారని ధృవీకరించారు. భద్రతా నిబంధనల ప్రకారం ప్రయాణికులను విమానం నుండి దించినట్లు ఎయిర్ ఇండియా ఎక్స్‌ప్రెస్ ప్రతినిధి తెలిపారు.
ప్రయాణికుల భయానక అనుభవం:
ఆ విమానంలో ప్రయాణించిన మినాల్ అహుజా రిపబ్లిక్ టీవీతో మాట్లాడుతూ ఆ భయానక క్షణాలను వివరించారు.
“మేము చాలా సాఫీగా ల్యాండింగ్ అవుతుందని ఆశించాము. విమానం రన్‌వేను తాకగానే ఒక్కసారిగా రెండు మూడు సార్లు గాల్లోకి ఎగిరి పడింది (Bounces). మేము సీట్ల నుండి ఎగిరి పడిపోతున్నట్లు అనిపించింది. అది చాలా కఠినమైన మరియు భయంకరమైన ల్యాండింగ్” అని తెలిపారు.