సోషల్ మీడియా వేదికగా నేరాలు పెరుగుతున్న నేపథ్యంలో, ఆధ్యాత్మిక ముసుగులో ఉన్న ఒక కామాంధుడి చేతిలో మోసపోయిన గుజరాత్కు చెందిన ఒక మహిళ, సైబర్ క్రైమ్ పోలీసుల సహాయంతో అతడిని జైలుకు పంపిన ఘటన వెలుగులోకి వచ్చింది.
గుజరాత్కు చెందిన ఆ మహిళకు సోషల్ మీడియా ద్వారా సుమిత్ శర్మ అనే వ్యక్తి పరిచయమయ్యాడు. తాను ఒక ఆధ్యాత్మిక ప్రసంగకర్తనని చెప్పుకుంటూ, మొదట్లో దేవుడు, ధ్యానం వంటి విషయాల గురించి భక్తిగా మాట్లాడుతూ ఆమె నమ్మకాన్ని గెలుచుకున్నాడు. కానీ, కాలక్రమేణా తన అసలు రూపాన్ని బయటపెట్టి, ఆమెతో అసభ్యంగా మాట్లాడటమే కాకుండా, తనతో సన్నిహితంగా ఉండాలని వేధించడం మొదలుపెట్టాడు. దీంతో షాక్కు గురైన ఆ మహిళ, వెంటనే అతనితో సంబంధాన్ని తెంచుకుని, అన్ని సోషల్ మీడియా ప్లాట్ఫారమ్లలో అతడిని ‘బ్లాక్’ (Block) చేసింది.
తనను ఆ మహిళ దూరం పెట్టిందనే కోపంతో, సుమిత్ శర్మ ప్రతీకారం తీర్చుకోవాలని నిర్ణయించుకున్నాడు. ఇన్స్టాగ్రామ్ నుండి ఆ మహిళ మరియు ఆమె తల్లి ఫోటోలను దొంగిలించి, ‘ఏఐ’ (AI – కృత్రిమ మేధస్సు) సాంకేతికతను ఉపయోగించి వాటిని అసభ్యకరమైన ఫోటోలుగా మార్చేశాడు. అంతేకాకుండా, ఇన్స్టాగ్రామ్, ఎక్స్ (ట్విట్టర్), యూట్యూబ్ మరియు ఫేస్బుక్లలో ఆ మహిళ పేరుతో 10 నకిలీ ఖాతాలను తెరిచి, ఈ అసభ్య ఫోటోలను ఇంటర్నెట్లో వైరల్ చేశాడు. దీనిని చూసి ఆమె కుటుంబం తీవ్ర మనస్తాపానికి గురైంది. అయితే ఆ మహిళ ధైర్యంగా అహ్మదాబాద్ సైబర్ క్రైమ్ పోలీసులకు ఫిర్యాదు చేసింది.
కేసు నమోదు చేసిన పోలీసులు, దర్యాప్తు చేపట్టి.. ఢిల్లీలో దాక్కుని మరో మహిళను మోసం చేయడానికి ప్లాన్ చేస్తున్న సుమిత్ శర్మను పట్టుకుని అరెస్టు చేశారు. ఆధ్యాత్మికత వెనుక దాక్కుని మహిళలను అత్యంత నీచంగా వేధిస్తున్న ఈ నకిలీ సన్యాసి అరెస్టు గుజరాత్లో సంచలనం సృష్టించింది. ఈ ఘటన తర్వాత, తెలియని వ్యక్తులతో పరిచయాలు పెంచుకునేటప్పుడు, సోషల్ మీడియాలో ఫోటోలను పంచుకునేటప్పుడు మహిళలు చాలా అప్రమత్తంగా ఉండాలని సైబర్ క్రైమ్ పోలీసులు హెచ్చరించారు.