చెన్నై: పల్లవరం సమీపంలోని అనకాపుత్తూరులో తనను లైంగికంగా వేధిస్తున్నాడనే కోపంతో మామను కోడలు అరివాణంతో (కూరగాయలు కోసే కత్తి) నరికి చంపిన ఘటన తీవ్ర సంచలనం సృష్టించింది.
ఏం జరిగింది?: అనకాపుత్తూరుకు చెందిన పెరుమాళ్ (58) అనే వ్యక్తి తన కుమారుడు మరణించిన తర్వాత, కోడలైన మీనా (28) తో కలిసి అదే ఇంట్లో ఉంటున్నాడు. గత మూడు నెలల క్రితం మీనా భర్త మణికండన్ అనారోగ్యంతో మరణించాడు. అప్పటి నుండి మీనా తన ఇద్దరు పిల్లలతో కలిసి అత్తమామల ఇంట్లోనే నివసిస్తోంది. భర్త లేని అవకాశాన్ని ఆసరాగా చేసుకుని, మామ పెరుమాళ్ తరచూ కోడలిపై లైంగిక వేధింపులకు పాల్పడుతుండేవాడు.
హత్య: నిన్న అర్థరాత్రి 2 గంటల సమయంలో పిల్లలతో కలిసి నిద్రిస్తున్న మీనా వద్దకు వెళ్లిన పెరుమాళ్, తన కోరికను తీర్చుకోవాలని బలవంతం చేశాడు. దీనిని మీనా తీవ్రంగా వ్యతిరేకించి, అక్కడి నుండి వెళ్ళిపోమని హెచ్చరించింది. అయినా వినకుండా అతను మరింతగా వేధించడంతో, కోపంతో ఊగిపోయిన మీనా.. వంటగదిలో ఉన్న అరివాణాన్ని తీసుకుని పెరుమాళ్ మెడపై బలంగా నరికింది. తీవ్ర రక్తస్రావం కావడంతో అతను అక్కడికక్కడే మరణించాడు.
పోలీసుల దర్యాప్తు: స్థానికుల సమాచారం మేరకు సంఘటనా స్థలానికి చేరుకున్న శంకర్ నగర్ పోలీసులు, పెరుమాళ్ మృతదేహాన్ని పోస్టుమార్టం నిమిత్తం తాంబరం ప్రభుత్వ ఆసుపత్రికి తరలించారు. ఈ ఘటనపై కేసు నమోదు చేసుకున్న పోలీసులు.. మీనాను అదుపులోకి తీసుకున్నారు. కేవలం వేధింపుల వల్లే ఈ హత్య జరిగిందా లేక మరేదైనా ఆస్తి తగాదాలు ఉన్నాయా అనే కోణంలో పోలీసులు విచారణ జరుపుతున్నారు.