బెంగళూరు: తన కుటుంబంపై క్షుద్రపూజలు చేస్తానని బెదిరించి, ఒక మహిళపై లైంగిక దాడికి పాల్పడిన జ్యోతిష్యుడిపై పోలీసులు కేసు నమోదు చేశారు. చన్నమనకెరె అచ్చుకట్టు ప్రాంతంలో జరిగిన ఈ ఘటనలో మోహన్ కుమార్ (38) అనే వ్యక్తిపై కేసు నమోదైంది.
ఘటన వివరాలు: ఓ బ్యూటీషియన్ అకాడమీ నడుపుతున్న 34 ఏళ్ల మహిళ ఈ మేరకు పోలీసులకు ఫిర్యాదు చేసింది. తన సోదరిని అకాడమీలో చేర్పించాలనే సాకుతో మోహన్ కుమార్ ఆమెకు పరిచయమయ్యాడు. ఆ తర్వాత మాటలతో ఆమెను నమ్మించి, వ్యాపారం అభివృద్ధి చెందాలంటే కొన్ని ప్రత్యేక పూజలు చేయాలని సూచించాడు.
పూజలు చేయడానికి మహిళ ఇంటికి వచ్చిన మోహన్ కుమార్, ఆచారంలో భాగంగా ఆమె భర్తను, కుమారుడిని ఇంటి నుంచి బయటకు పంపాడు. సమీపంలోని ఒక చెట్టు చుట్టూ గంట సేపటి వరకు ప్రదక్షిణలు చేయాలని వారికి సూచించాడు. వారు వెళ్ళిన తర్వాత ఇంట్లో ఒంటరిగా ఉన్న మహిళపై అతడు లైంగిక దాడికి ప్రయత్నించాడు. ఆమె ప్రతిఘటించడంతో, క్షుద్రపూజలు చేసి తన కుటుంబాన్ని నాశనం చేస్తానని భయపెట్టి ఆమెపై అత్యాచారానికి పాల్పడ్డాడు.
అవమాన భారంతో మొదట ఈ విషయాన్ని ఎవరికీ చెప్పని ఆ మహిళ, తీవ్ర మానసిక ఒత్తిడికి గురై ఆత్మహత్యకు ప్రయత్నించింది. ఆ తర్వాత అసలు విషయాన్ని బయటపెట్టి పోలీసులకు ఫిర్యాదు చేసింది. ప్రస్తుతం పరారీలో ఉన్న నిందితుడు మోహన్ కుమార్ కోసం పోలీసులు గాలింపు చర్యలను ముమ్మరం చేశారు.