రోడ్డు ప్రయాణంలో కారులో మ్యూజిక్ వినడం సాధారణం, కానీ ఇప్పుడు రోడ్డే పాటలు పాడుతోంది! ముంబైలోని కోస్టల్ రోడ్ కారిడార్‌లో ఏర్పాటు చేసిన భారతదేశపు మొట్టమొదటి **’మ్యూజికల్ రోడ్’**ను మహారాష్ట్ర ముఖ్యమంత్రి దేవేంద్ర ఫడ్నవీస్ బుధవారం (ఫిబ్రవరి 11) ప్రారంభించారు.
ఈ రోడ్డు ఎక్కడ ఉంది? ముంబైలోని నారిమన్ పాయింట్ నుండి వర్లీ వైపు వెళ్లే కోస్టల్ రోడ్డులో, టన్నెల్ దాటిన అర కిలోమీటరు తర్వాత ఈ మ్యూజికల్ స్ట్రిప్స్ ఉన్నాయి. మీ కారు గంటకు 60 కిలోమీటర్ల వేగంతో వెళ్తున్నప్పుడు, రోడ్డుపై ఉండే ప్రత్యేక గీతల వల్ల మీ కారులో ‘స్లమ్‌డాగ్ మిలియనీర్’ సినిమాలోని ‘జై హో’ పాట ధుని వినిపిస్తుంది.
ముఖ్య అంశాలు:
- ప్రపంచంలో 5వ దేశం: జపాన్ (2007లో ప్రారంభం), హంగేరి, దక్షిణ కొరియా, యూఏఈ తర్వాత ఇటువంటి రహదారి కలిగిన 5వ దేశంగా భారత్ నిలిచింది.
- ఎలా పనిచేస్తుంది?: రోడ్డుపై ప్రత్యేకమైన ఖాళీలు (Grooves) ఉంటాయి. కారు టైర్లు ఆ గీతలపై వేగంగా వెళ్లినప్పుడు కలిగే ప్రకంపనల ద్వారా ఈ సంగీతం పుడుతుంది. దీనిని ప్రపంచవ్యాప్తంగా ‘మెలోడీ రోడ్’ అని పిలుస్తారు.
- ఖర్చు: దీని కోసం బిఎంసి (BMC) సుమారు రూ. 6.21 కోట్లు ఖర్చు చేసింది. హంగేరీకి చెందిన ఒక కంపెనీ ఈ ప్రాజెక్టును పూర్తి చేసింది.