భారత్ మరియు అమెరికా మధ్య కుదిరిన చారిత్రాత్మక వాణిజ్య ఒప్పందం వెనుక నెలల తరబడి సాగిన తీవ్రమైన దౌత్య యుద్ధం ఉంది. భారత్‌ను బెదిరించాలని లేదా ఒత్తిడికి గురిచేయాలని చూడవద్దని, అవసరమైతే డొనాల్డ్ ట్రంప్ పదవీ కాలం ముగిసే వరకు వేచి ఉండటానికి కూడా భారత్ సిద్ధంగా ఉందని అజిత్ డోవల్ అమెరికాకు స్పష్టం చేసినట్లు వెల్లడైంది.
ఏం జరిగిందంటే? గత సెప్టెంబర్‌లో వాషింగ్టన్‌లో యూఎస్ స్టేట్ సెక్రటరీ మార్కో రూబియోతో జరిగిన భేటీలో అజిత్ డోవల్ ఈ ‘ఆపరేషన్ ట్రంప్’ను ప్రారంభించారు. రష్యా నుండి చమురు కొనుగోలు చేస్తున్నందుకు భారత్‌పై ఆంక్షలు విధిస్తామని, అమెరికా వ్యవసాయ ఉత్పత్తులకు భారత్ పన్నులు తగ్గించాలని ట్రంప్ ప్రభుత్వం ఒత్తిడి తెచ్చింది. దీనికి డోవల్ ఇచ్చిన సమాధానం అమెరికాను ఆశ్చర్యపరిచింది.
డోవల్ మార్క్ హెచ్చరిక:
- “భారత్‌ను బుల్డోజ్ చేయాలని చూడకండి. గతంలో కూడా భారత్ పట్ల శత్రుత్వ వైఖరి అవలంబించిన అమెరికా ప్రభుత్వాలను మేము చూశాం, వాటిని అధిగమించాం” అని డోవల్ గుర్తుచేశారు.
- జాతీయ ప్రయోజనాలను పణంగా పెట్టి ఎలాంటి ఒప్పందం చేసుకోమని, ఒప్పందానికి లొంగిపోవడం కంటే ట్రంప్ పదవీ కాలం ముగిసే వరకు వేచి ఉండటమే భారత్‌కు మేలని ఆయన తేల్చి చెప్పారు.
- బహిరంగ వేదికలపై భారత్‌ను విమర్శించడం ఆపకపోతే చర్చలు ముందుకు సాగవని రూబియోకు ముఖం మీదే చెప్పారు.
మొండి వైఖరి వీడిన ట్రంప్: రష్యా చమురు కొనుగోలును ‘రక్తపు కూడు’ (Blood Money) అని విమర్శించిన ట్రంప్ సలహాదారు పీటర్ నవారో వ్యాఖ్యలను భారత్ తీవ్రంగా ఖండించింది. డోవల్ ఇచ్చిన గట్టి హెచ్చరిక తర్వాతే వైట్ హౌస్ స్వరం మారింది. ప్రధాని మోదీ పుట్టినరోజున ట్రంప్ స్వయంగా ఫోన్ చేసి శుభాకాంక్షలు తెలపడం, ఆ తర్వాత పలుమార్లు చర్చలు జరపడం ఈ మార్పుకు సంకేతం.
చివరకు భారత్ కోరినట్లే:
- దిగుమతి సుంకాలను (Tariffs) 50 శాతం నుండి 18 శాతానికి తగ్గించడానికి ట్రంప్ అంగీకరించారు.
- రష్యా చమురుపై పెనాల్టీలు విధించాలనే ప్రతిపాదనను విరమించుకున్నారు.
- భారత వ్యవసాయ మరియు డెయిరీ రంగానికి నష్టం కలగకుండానే ఒప్పందం కుదిరింది.