పట్టణ వాతావరణంలో మనుషులతో కలిసి జీవించే పక్షుల ప్రవర్తనపై జరిగిన ఒక కొత్త అంతర్జాతీయ అధ్యయనంలో ఆశ్చర్యకరమైన విషయం వెలుగులోకి వచ్చింది.
ఆ అధ్యయనం ప్రకారం, మనం సాధారణంగా చూసే పావురాలు, మైనాలు మరియు పిచ్చుకల లాంటి పక్షుల దగ్గరకు ఒక పురుషుడు వెళ్లినప్పుడు, అవి కాస్త ప్రశాంతంగా ఉండి తమను సమీపించేందుకు అనుమతిస్తాయి.
కానీ, అదే పక్షుల దగ్గరకు ఒక మహిళ వెళ్లినప్పుడు, అవి వెంటనే ప్రమాదాన్ని పసిగట్టి భయపడి అక్కడి నుంచి ఎగిరిపోతాయి. ఐరోపా దేశాలకు చెందిన ఐదు వేర్వేరు నగరాల్లో, 37 రకాల పక్షులను ఉపయోగించి నిర్వహించిన ఈ అధ్యయనంలో ఈ విచిత్రమైన నిజం బయటపడింది.
పక్షులు తమను భయపెట్టే వ్యక్తి నుంచి ఎంత దూరంలో ఉన్నప్పుడు ఎగిరిపోతాయో కొలిచే ‘ఫ్లైట్ డిస్టెన్స్’ (ఎగిరిపోయే దూరం) పద్ధతిని ఉపయోగించి ఈ అధ్యయనం నిర్వహించారు. ఈ అధ్యయనంలో పాల్గొన్న కాలిఫోర్నియా విశ్వవిద్యాలయ ప్రొఫెసర్ డేనియల్ బ్లమ్‌స్టీన్ మరియు చెక్ రిపబ్లిక్ దేశానికి చెందిన మహిళా శాస్త్రవేత్త యానినా బెనెడిట్టి ఈ ఫలితాన్ని చూసి మొదట్లో ఆశ్చర్యపోయారు.
మనుషులను చూసే పక్షులు.. స్త్రీ, పురుషులను చాలా సూక్ష్మంగా వేరు చేసి చూస్తాయని ఈ అధ్యయనం స్పష్టంగా నిర్ధారించింది.
పక్షులు మనుషుల నడక తీరు, శరీర నిర్మాణం, ధరించిన దుస్తుల రంగు లేదా శరీర వాసన.. వీటిలో దేనిని బట్టి స్త్రీ, పురుష వ్యత్యాసాన్ని గుర్తిస్తాయనేది ఇంకా పూర్తిగా శాస్త్రీయంగా నిరూపించబడలేదు.
అయినప్పటికీ, పక్షులు మనుషుల కదలికలను గమనించడంలో ఎంత చురుకుగా ఉంటాయో ఈ పరిశోధన తేటతెల్లం చేసింది. జంతుశాస్త్ర అధ్యయనాల్లో మానవ పరిశీలకుల లింగాన్ని (జెండర్) ఇప్పటివరకు పెద్దగా పరిగణనలోకి తీసుకోని నేపథ్యంలో, ఈ ఫలితం శాస్త్రవేత్తలకు కొత్త ఆలోచనను ఇచ్చింది.
ఈ శాస్త్రీయ ఆవిష్కరణ కేవలం ఆసక్తికరమైన సమాచారం మాత్రమే కాకుండా, భవిష్యత్తులో జరిగే జంతు, పక్షి సంబంధిత అధ్యయనాల్లో పెద్ద మార్పులను తీసుకువస్తుందని భావిస్తున్నారు.
ఇకపై నిర్వహించే అధ్యయనాల్లో మహిళా, పురుష పరిశోధకుల భాగస్వామ్యం పక్షుల ప్రవర్తనపై ఎలాంటి ప్రభావం చూపుతుందనేది శాస్త్రవేత్తలు గమనించాల్సి ఉంది.
పక్షులు మహిళలను చూసి ఎందుకు ఎక్కువగా అప్రమత్తమవుతాయి అనే దానికి గల కారణాన్ని కనుగొనేందుకు ప్రపంచవ్యాప్తంగా ఉన్న పరిశోధకులు ప్రస్తుతం మరిన్ని కొత్త ప్రయోగాలను కొనసాగిస్తున్నారు.
Leave a Reply