మతం అనేది మనుషులను ఏకం చేయడానికి, మానసిక ప్రశాంతతను ఇవ్వడానికి ఉద్దేశించబడింది. కానీ, నేడు మతం పేరుతో అమానవీయ ఘటనలు జరుగుతున్నాయి. ఇతరులను హింసించే స్థాయికి మతం పట్ల ఉన్న కరుడుగట్టిన అభిప్రాయాలు దిగజారిపోతున్నాయి. తాజాగా యుగాండాలో జరిగిన ఒక హృదయవిదారక ఘటన ప్రపంచాన్ని దిగ్భ్రాంతికి గురిచేసింది. తన కూతురు మతం మారిందన్న కోపంతో ఒక తండ్రి ఆమెను సజీవదహనం చేసేందుకు ప్రయత్నించాడు.
ఏం జరిగింది? యుగాండాలో నివసించే 24 ఏళ్ల రహేమా క్యోముహెందో అనే యువతి ఇస్లాం మతాన్ని వదిలి క్రైస్తవ మతంలోకి మారింది. ఈ విషయం తెలిసిన ఆమె తండ్రి (ఒక మత గురువు), తీవ్ర ఆగ్రహంతో ఊగిపోయాడు. ఇంట్లో ఉన్న పెట్రోల్ను ఆమెపై పోసి నిప్పంటించాడు. ఈ ఘటనలో ఆమె కడుపు, కాళ్లు, గొంతు మరియు వెనుక భాగం తీవ్రంగా కాలిపోయాయి.
ఆసుపత్రిలో వేదన: తీవ్ర గాయాలతో ఆమెను ఎంబెల్ రీజినల్ రిఫరల్ ఆసుపత్రిలో చేర్పించారు. అక్కడ దాదాపు ఒక నెల పాటు చికిత్స పొందుతోంది. స్పృహలోకి వచ్చిన తర్వాత ఆ యువతి తన తండ్రి చేసిన ఈ దారుణాన్ని బయటపెట్టింది. తన ఆంటీ ఇంట్లో ఉంటున్న సమయంలో రేడియో ద్వారా క్రైస్తవ మతం గురించి విని, ఆమె ఆ మతం వైపు ఆకర్షితురాలైంది. తన తండ్రికి తెలిసిన ఒక పాస్టర్ ద్వారా మతం మారింది. ఈ విషయం తెలియగానే ఆమెను మొదట బాగా కొట్టిన తండ్రి, ఆ తర్వాత రంజాన్ పదకొండో రోజున ఈ దారుణానికి ఒడిగట్టాడు.
యుగాండాలో 84 శాతం క్రైస్తవులు, 14 శాతం ముస్లింలు ఉన్నప్పటికీ, ఇలాంటి మతపరమైన అసహనం వల్ల ఇలాంటి ఘటనలు చోటుచేసుకోవడం విచారకరం.