పెళ్లి వేడుక అంటే ఆ ఇంట్లో ఎంతో సందడి ఉంటుంది. షాపింగ్, ఇతర పనులతో కుటుంబ సభ్యులంతా రోజంతా బిజీగా ఉంటారు. అయితే పెళ్లి ఇంట్లో ఆనందోత్సాహాలు వెల్లివిరుస్తున్న సమయంలో, అక్షయ తృతీయ రోజే వరుడు మరణించిన ఘటన జలగావ్ జిల్లాలో చోటుచేసుకుంది.
వివాహానికి మరో ఎనిమిది రోజులు మాత్రమే సమయం ఉండగా, వరుడు గుండెపోటుతో మరణించడంతో ఆ కుటుంబంలో తీవ్ర విషాదం నిండింది. జలగావ్ జిల్లాలోని వరణ్గావ్, భోయివాడ ప్రాంతంలో నివసించే రితేష్ రవీంద్ర సోనవణే (30) అక్షయ తృతీయ రోజు ఉదయం 7:30 గంటలకు గుండెపోటుతో కన్నుమూశారు. దీనితో సోనవణే కుటుంబం శోకసంద్రంలో మునిగిపోయింది.
అందిన సమాచారం ప్రకారం, రితేష్ సోనవణేకు బుల్దానా జిల్లా మల్కాపూర్ సమీపంలోని దేవబాద గ్రామానికి చెందిన పాండురంగ్ బోర్సే కుమార్తెతో ఏప్రిల్ 28న వివాహం నిశ్చయమైంది. పెళ్లికి ఇంకా ఎనిమిది రోజులే సమయం ఉండటంతో రితేష్ పనుల్లో నిమగ్నమై ఉన్నాడు. కానీ విధి మరోలా తలచింది. ఉదయం ఛాతీలో నొప్పి రావడంతో ఇంట్లోనే కుప్పకూలిపోయాడు. కుటుంబ సభ్యులు వెంటనే ఆసుపత్రికి తరలించగా, అప్పటికే అతను మరణించినట్లు వైద్యులు ధృవీకరించారు.
రెండు రోజుల క్రితమే స్నేహితులతో బర్త్ డే వేడుకలు రితేష్ సోనవణే పుట్టినరోజును కేవలం రెండు రోజుల క్రితమే అతని స్నేహితులు ఘనంగా జరిపారు. ఇంట్లో అప్పటికే పెళ్లి సందడి మొదలైంది. ఇంతలోనే ఈ దురదృష్టకర సంఘటన జరగడం అందరినీ కలిచివేసింది.
ఈ ఘటనతో వరణ్గావ్ పట్టణంలో విషాద ఛాయలు అలముకున్నాయి. స్థానికులు పండుగను పక్కన పెట్టి బాధితుడి కుటుంబానికి అండగా నిలిచారు. ఉదయం 11 గంటలకు శ్మశానవాటికలో రితేష్ అంత్యక్రియలు నిర్వహించారు. మృతుడికి తల్లిదండ్రులు, ఒక తమ్ముడు ఉన్నారు.