అడిలైడ్: ఆస్ట్రేలియాలోని అడిలైడ్లో ఉన్న ఒక మసాజ్ సెంటర్లో పనిచేస్తున్న 39 ఏళ్ల భారత సంతతికి చెందిన మసాజ్ థెరపిస్ట్, 61 మంది మహిళలపై లైంగిక వేధింపులకు పాల్పడినట్లు తీవ్ర ఆరోపణలు వచ్చాయి.
ఈ కేసును విచారించిన ఆస్ట్రేలియా కోర్టు అతనికి 13 సంవత్సరాల 10 నెలల జైలు శిక్ష విధించింది. నిందితుడి ప్రవర్తన “నియంత్రణ లేనిది” గా ఉందని, “పోలీసులకు దొరికిపోయే వరకు అతడు తన ప్రవర్తనలో ఎలాంటి నియంత్రణను ప్రదర్శించలేదు” అని న్యాయమూర్తి వ్యాఖ్యానించారు. భారతదేశానికి చెందిన సుమిత్ సతీష్ రస్తోగి, ఎలాంటి సరైన విద్యా అర్హతలు లేనప్పటికీ గ్లెనెల్గ్ (Glenelg) నగరంలోని ఒక మసాజ్ సెంటర్లో పనిచేస్తూ వచ్చాడు. పలు నెలల పాటు అతడు నిరంతరంగా చేసిన ఈ నేరాలకు గాను, అతడు కనీసం ఒక దశాబ్దం పాటు జైలు శిక్ష అనుభవించాల్సి ఉంటుందని కోర్టు పేర్కొంది. నివేదికల ప్రకారం, నిందితుడైన మసాజ్ థెరపిస్ట్ రస్తోగి.. 55 అశ్లీల వీడియోలను చిత్రీకరించిన నేరాలు మరియు 42 తీవ్రమైన లైంగిక దాడి నేరాలతో సహా మొత్తం 97 నేరాలను అంగీకరించాడు. ఇందుకు శిక్షగా కోర్టు అతనికి 13 సంవత్సరాల 10 నెలల జైలు శిక్ష విధించింది. ఇందులో 10 సంవత్సరాల 10 నెలల పాటు అతనికి ఎలాంటి పరోల్ (Parole) లభించదు. అంతేకాకుండా, శిక్షా కాలం ముగిసి విడుదలైన తర్వాత అతడిని ఆస్ట్రేలియా నుండి డిపోర్ట్ (దేశం నుండి బహిష్కరించడం) చేస్తారని భావిస్తున్నారు.
అక్టోబర్ 2021 నుండి జూలై 2022 వరకు, గ్లెనెల్గ్లోని ‘4ఎవర్ మసాజ్ క్లినిక్’ లో పనిచేసిన రస్తోగి, కొందరు మహిళా కస్టమర్లను లక్ష్యంగా చేసుకుని, వారు కనీసం అనుమానించని విధంగా ఈ నేరాలకు పాల్పడ్డాడు. సౌత్ ఆస్ట్రేలియా డిస్ట్రిక్ట్ కోర్టు అతనికి శిక్ష విధిస్తున్న సమయంలో న్యాయమూర్తి స్పందిస్తూ.. “బాధితులు నిన్ను నమ్మారు, నిన్ను ఎంతమాత్రం అనుమానించలేదు, రక్షణ మరియు గౌరవం ఆశించి ఇక్కడికి వచ్చారు. కానీ నువ్వు వారి నమ్మకాన్ని దుర్వినియోగం చేసి, వారిని ఏమాత్రం గౌరవం, మర్యాద లేకుండా చూశావు” అని మండిపడ్డారు. కాలక్రమేణా ఆ ఉద్యోగి ప్రవర్తన మరింత దారుణంగా మరియు బహిరంగంగా మారిందని న్యాయమూర్తి తెలిపారు.
కోర్టు విచారణలో మసాజ్ థెరపిస్ట్ రస్తోగి తన నేరాలకు గల కారణాన్ని చెబుతూ.. “నాకు ఇతరుల వ్యక్తిగత విషయాలను/రహస్యాంగాలను దొంగతనంగా చూడాలనే మానసిక రుగ్మత (Voyeurism) ఉంది, అలాగే నా వైవాహిక జీవితంలో సమస్యలు ఉన్నాయి” అని పేర్కొన్నట్లు కోర్టు తెలిపింది. అయినప్పటికీ, ఆ మానసిక సమస్య అతడు చేసిన ఘోరమైన ప్రవర్తనను సమర్థించలేదని, అతడు తన ప్రవర్తనను నియంత్రించుకోలేకపోయాడనడానికి లేదా తను చేసేది తప్పని అర్థం చేసుకోలేకపోయాడనడానికి ఎలాంటి ఆధారాలు లేవని న్యాయమూర్తి తీవ్రంగా స్పష్టం చేశారు.
బాధితులు ఇచ్చిన ఫిర్యాదు నివేదికలలో అతడిని ఒక “క్రూరుడు” మరియు “అసహ్యకరమైన వ్యక్తి” గా అభివర్ణించారు. చాలా మంది మహిళలు తాము ప్రారంభంలో తీవ్ర ఇబ్బందిగా (Uncomfortable) ఫీల్ అయినప్పటికీ, ఆ సంఘటనల గురించి వెంటనే పోలీసులకు ఫిర్యాదు చేయలేకపోయామని ఆవేదన వ్యక్తం చేశారు.