“మా దేశంలో ప్రభుత్వ ఉద్యోగం.. విదేశాల్లో ఆస్తులు!” పాకిస్థాన్ అధికారులపై ఆ దేశ మంత్రి షాకింగ్ కామెంట్స్.. పాకిస్థాన్‌లో రేగిన కొత్త వివాదం..!!

భారీ అప్పులు, నింగినంటిన ధరలతో తీవ్ర ఆర్థిక సంక్షోభంలో కూరుకుపోయిన పాకిస్థాన్‌లో, అక్కడి ప్రభుత్వ ఉన్నతాధికారులు విదేశాల్లో స్థిరపడేందుకు ప్లాన్ చేస్తున్నారనే ఆరోపణలు కొత్త వివాదానికి దారితీశాయి.

రక్షణ మంత్రి ఖవాజా ఆసిఫ్ ఆరోపణలు:
పాకిస్థాన్ రక్షణ మంత్రి ఖవాజా ఆసిఫ్ (Khawaja Asif) మాట్లాడుతూ.. సర్వీసులో ఉన్న పలువురు ఉన్నతాధికారులు విదేశాల్లో ఆస్తులు కొనుగోలు చేసి, అక్కడే శాశ్వతంగా నివసించడానికి ఏర్పాట్లు చేసుకుంటున్నారని సంచలన ఆరోపణలు చేశారు. ముఖ్యంగా కెనడా, అమెరికా, బ్రిటన్‌లతో పాటు ప్రస్తుతం పోర్చుగల్ దేశం కూడా ఈ అధికారులకు ఇష్టమైన ప్రాంతంగా మారుతోందని ఆయన పేర్కొన్నారు.

ద్వంద్వ పౌరసత్వం వివాదం:
గతంలో వెలువడిన కథనాల ప్రకారం, 2,500 కంటే ఎక్కువ మంది ప్రభుత్వ అధికారులకు ద్వంద్వ పౌరసత్వం ఉందనే విషయంపై ఇప్పటికే విచారణ జరుగుతోంది. అంతేకాకుండా, కేంద్ర ప్రభుత్వ ఉద్యోగుల పౌరసత్వ వివరాలను తనిఖీ చేసినప్పుడు, కొంతమంది అధికారులు తమ కుటుంబ సభ్యుల ద్వంద్వ పౌరసత్వానికి సంబంధించిన వివరాలను దాచిపెట్టినట్లు ఆరోపణలు వచ్చాయి.

పార్లమెంటరీ కమిటీ విచారణ:
పాకిస్థాన్ అధికారులు పోర్చుగల్‌లో ఆస్తులు కొనుగోలు చేసి పౌరసత్వం పొందడానికి ప్రయత్నిస్తున్నారని ఖవాజా ఆసిఫ్ ఆరోపించిన నేపథ్యంలో, పాకిస్థాన్ పార్లమెంటరీ పబ్లిక్ అకౌంట్స్ కమిటీ (PAC) విదేశాల్లో ఆస్తులు కొనుగోలు చేసిన అధికారుల వివరాలను సమర్పించాలని ఆదేశించింది. దేశం తీవ్ర ఆర్థిక సంక్షోభంలో ఉన్న సమయంలో అధికారుల విదేశీ ఆస్తులు, పౌరసత్వ యత్నాలు పాకిస్థాన్ ప్రజల్లో తీవ్ర ఆగ్రహాన్ని కలిగిస్తున్నాయి.