వేసవి కాలం రాగానే మనందరికీ గుర్తుకు వచ్చేది మామిడి పండ్ల తీపి రుచి. సీజన్ మొదలవ్వగానే రోడ్ల పక్కన రకరకాల మామిడి పండ్లు కుప్పలుగా కనిపిస్తుంటాయి. బాగా పండిన మామిడి పండ్లను చూడగానే కొని తినాలని అనిపించడం సహజమే. కానీ, కొనే ముందు ఒక్కసారి ఆలోచించడం మంచిది.
మామిడి పండ్ల సీజన్ అయినప్పటికీ, ఇప్పటికీ చాలా చోట్ల పచ్చి మామిడిని త్వరగా పండించడానికి కాల్షియం కార్బైడ్ వంటి రసాయనాలను విరివిగా ఉపయోగిస్తున్నారు. చూడటానికి సహజంగా పండినట్లు కనిపించినా, వీటిని తినడం వల్ల తలనొప్పి, తల తిరగడం, వాంతులు మరియు నరాల బలహీనత వంటి సమస్యలు తలెత్తవచ్చు.
కాల్షియం కార్బైడ్ ఎందుకు ప్రమాదకరం?
కాల్షియం కార్బైడ్ నుండి ఎసిటిలీన్ అనే గ్యాస్ వెలువడుతుంది. ఇందులో ఆర్సెనిక్ మరియు ఫాస్పరస్ వంటి హానికరమైన మూలకాలు ఉంటాయి. ఇవి ఆరోగ్యానికి చాలా ప్రమాదకరం. వీటివల్ల చర్మంపై పుండ్లు పడటం, ఆహారం మింగడంలో ఇబ్బంది కలగడం వంటి సమస్యలు రావచ్చు. అందుకే భారతదేశంలో కాల్షియం కార్బైడ్ ఉపయోగించి పండ్లను పండించడాన్ని ఆహార భద్రత విభాగం (FSSAI) నిషేధించింది.
నిజానికి మామిడి పండ్లలో ఫైబర్, విటమిన్ సి, విటమిన్ ఏ మరియు యాంటీ ఆక్సిడెంట్లు పుష్కలంగా ఉంటాయి. కానీ, రసాయనాలతో పండించిన పండ్లను తింటే ప్రయోజనం కంటే నష్టమే ఎక్కువ.
కృత్రిమంగా పండించిన మామిడిని గుర్తించే 3 మార్గాలు:
- తొక్కను గమనించండి: సహజంగా పండిన మామిడి పండు తొక్క అన్ని వైపులా ఒకే రంగులో ఉండదు. ఒకవేళ పండు మొత్తం ఒకే రంగులో మెరిసిపోతూ ఉంటే, అది రసాయనాలతో పండించిందని అనుమానించాలి. అలాగే తొక్కపై నల్లటి చుక్కలు ఉన్న పండ్లను కొనకండి.
- ప్రెజర్ టెస్ట్: పండును చేతితో పట్టుకున్నప్పుడు పైకి మెత్తగా అనిపించి, లోపల మాత్రం గట్టిగా ఉంటే అది కృత్రిమంగా పండించినదని అర్థం. సహజంగా పండిన పండు లోపల, బయట సమానంగా మెత్తబడుతుంది.
- నీటిలో వేసి చూడండి: ఒక గిన్నెలో నీరు పోసి మామిడి పండును అందులో వేయండి. ఒకవేళ పండు నీటిపై తేలుతూ ఉంటే, అది రసాయనాలతో పండించినది కావచ్చు. ఎందుకంటే కాల్షియం కార్బైడ్ వాడకం వల్ల పండులోని గుజ్జు పరిమాణం తగ్గి, దాని బరువు తగ్గుతుంది. సహజంగా పండిన పండు నీటిలో మునుగుతుంది.